IMD મુજબ, તારીખ 23 થી 26 મે દરમિયાન સક્રિય વેસ્ટર્ન ડિસ્ટર્બન્સ સમગ્ર ઉત્તરીય પ્રદેશમાં આગળ વધે તેવી સંભાવના છે. અરબી સમુદ્રની સાથે સાથે બંગાળની ખાડીમાંથી આવતી ઠંડી હવાને કારણે વાતાવરણમાં ભેજનું પ્રમાણ વધવાની ધારણા છે, જેના કારણે વરસાદની શક્યતાઓ વધી છે. આવી સ્થિતિમાં આગામી 3 દિવસ દરમિયાન ઉત્તર-પશ્ચિમ ભારતમાં દિવસના તાપમાનમાં ચારથી છ ડિગ્રીનો ઘટાડો થવાની સંભાવના છે. વૈજ્ઞાનિકો નિર્દેશ કરે છે કે, ચોમાસા પહેલાના સમયગાળા દરમિયાન આવા વાવાઝોડા સામાન્ય છે, અને તે મોટે ભાગે ઉત્તર-પશ્ચિમ ભારત તેમજ ઉત્તર-પૂર્વીય રાજ્યોને અસર કરે છે.

જોકે આ વખતે દરિયામાંથી આવતા પવનની અસર વધુ જોવા મળે તેવી શક્યતા છે. IMDનાં વરિષ્ઠ વૈજ્ઞાનિકએ જણાવ્યું કે, અરબી સમુદ્રમાંથી મોટી માત્રામાં ભેજવાળી હવા ફૂંકાય તેવી અપેક્ષા છે. બંગાળની ખાડીથી ઉત્તરપૂર્વ ભારતમાં મજબૂત દક્ષિણ-પશ્ચિમ પવનો પણ ફૂંકાઈ રહ્યા છે. આ બંને સાથે મળીને આ પ્રદેશમાં વરસાદની પ્રવૃત્તિને મજબૂત બનાવી શકે છે. આવી સ્થિતિમાં, તારીખ 23 મેની સાંજથી તારીખ 26 મેની સાંજ સુધીના ચાર દિવસ દરમિયાન ઉત્તર-પશ્ચિમ ભારતમાં ઘણી જગ્યાએ ગાજવીજ, વીજળીનાં ચમકારા અને ક્યારેક જોરદાર પવન સાથે વરસાદની સંભાવના છે. બીજી તરફ તારીખ 24 અને 25 મેના રોજ તેની તીવ્રતા વધુ વધી શકે છે. ખાસ કરીને હિમાચલ પ્રદેશ અને જમ્મુ-કાશ્મીર-લદ્દાખ-ગિલગિટ બાલ્ટિસ્તાનનાં મોટાભાગનાં વિસ્તારોમાં મુશળધાર વરસાદ પડી શકે છે.

બીજી તરફ, ઉત્તરાખંડમાં 50-60 કિમી પ્રતિ કલાકની ઝડપે પવન ફૂંકાવાની સંભાવના છે, જે 24 મેના રોજ પંજાબ, હરિયાણા-ચંદીગઢ-દિલ્હી અને 25 મેના રોજ પશ્ચિમ ઉત્તર પ્રદેશ સુધી વિસ્તરી શકે છે. આગાહીમાં, આગામી બે-ત્રણ દિવસમાં પંજાબ અને હરિયાણા, પશ્ચિમ ઉત્તર પ્રદેશ અને ઉત્તર રાજસ્થાનમાં કરા પડવાની સંભાવના છે. તારીખ 23 અને 24 મેના રોજ બિહાર, પશ્ચિમ બંગાળ અને સિક્કિમમાં અલગ-અલગ સ્થળોએ કરા પડવાની પણ શક્યતા હતી. આ દરમિયાન જોરદાર પવન અને અતિવૃષ્ટિ નબળા માળખાને નુકસાન પહોંચાડી શકે છે. આવી સ્થિતિમાં, હવામાન વિભાગે સ્થાનિક વહીવટીતંત્રને તે મુજબ તૈયારી કરવા તાકીદ કરી છે. તેની અસર ઉત્તરપૂર્વ ભારતના ભાગોમાં પણ જોવા મળી શકે છે.

જ્યાં આગામી ચાર દિવસમાં આસામ, મેઘાલય, નાગાલેન્ડ, મણિપુર, મિઝોરમ અને ત્રિપુરામાં ગાજવીજ, વીજળી અને તેજ પવન સાથે ભારે વરસાદ પડી શકે છે. હવામાનનાં નિષ્ણાતએ જણાવ્યું હતું કે, સામાન્ય રીતે શિયાળામાં વેસ્ટર્ન ડિસ્ટર્બન્સ આવતા હોય છે. પરંતુ આ વર્ષે વિશિષ્ટ સ્થિતિના લીધે મે માસમાં પણ મજબુત વેસ્ટર્ન ડિસ્ટર્બન્સ આવવાની શક્યતા રહેશે. જે ઋતુ પરિવર્તન જેવું ગણાય છે. તેમના જણાવ્યા અનુસાર, 23 મેથી હવામાનમાં પલટો આવશે. તારીખ 24 થી 30 મેના દેશના ઉતર પર્વતીય પ્રદેશો પંજાબ, હરિયાણા, રાજસ્થાન, પૂર્વ યુપીમાં મુશળધાર વરસાદ થવાની શક્યતા છે. કેટલાક ભાગોમાં ગાજવીજ સાથે કરા પડવાની શક્યતા રહેશે. જેની અસરના કારણે ગુજરાતના અમુક ભાગોમાં ગાજવીજ સાથે વરસાદ પડવાની શક્યતા રહેશે.

જેમાં ઉતર ગુજરાત, મધ્ય ગુજરાતના પૂર્વ ગુજરાતના ભાગોમાં ગાજવીજ સાથે વરસાદની શક્યતા રહેશે. અરબ સાગરના ભેજ જેની અસર વેસ્ટર્ન ડિસ્ટર્બન્સને મળતા આવી સ્થિતિનું નિર્માણ થઇ શકે છે. સૌરાષ્ટ્રના ભાગો, કચ્છ અને દક્ષિણ ગુજરાતના ભાગોમાં પણ વરસાદની શક્યતા રહેશે. તેમજ આંધી વંટોળનું પ્રમાણ પણ વધુ રહેશે. હવામાન વિભાગની આ તાજેતરની આગાહીમાં ગરમીમાંથી મોટી રાહત મળવાના સંકેત દેખાઈ રહ્યા છે. હાલમાં દેશના મોટા ભાગમાં મહત્તમ તાપમાન 40થી 45 ડિગ્રી સેલ્સિયસની વચ્ચે છે. સોમવારે દિલ્હીમાં સૌથી વધુ તાપમાન 44.9℃ નોંધાયું હતું.

જ્યારે પશ્ચિમ ઉત્તર પ્રદેશમાં ઝાંસીમાં મહત્તમ તાપમાન 46.5 ℃ પર પહોંચ્યું હતું. હાલમાં, દિલ્હી અને દક્ષિણ હરિયાણા, દક્ષિણ-પશ્ચિમ ઉત્તર પ્રદેશ, ઉત્તર મધ્ય પ્રદેશ અને પૂર્વ ઝારખંડના ભાગોમાં ગરમીની લહેર પ્રવર્તી રહી છે. IMD કહે છે, “પરંતુ આગામી ત્રણ દિવસ દરમિયાન, જેમ વરસાદથી ભરેલા વાદળો આગળ વધશે, ઉત્તર પશ્ચિમ ભારતમાં દિવસના તાપમાનમાં 4 થી 6 ડિગ્રીનો ઘટાડો થવાની સંભાવના છે. આ પછી તાપમાનમાં કોઈ મોટો ફેરફાર નહીં થાય.