વલસાડના અટારના તળાવ ફળિયામાં રહેતા રીતેશ ચંદ્રકાન્તભાઈ શાહ વલસાડના ગિફ્ટ આર્ટિકલની દુકાનમાં નોકરી કરે છે. તેમની પત્ની સુનીતાબેન દમણની એક ખાનગી કંપનીમાં નોકરી કરે છે. દંપતીનો ૧૪ વર્ષીય પુત્ર કલ્પ અટારની પી.કે.ડી. વિદ્યાલયમાં ધોરણ ૮માં અભ્યાસ કરતો હતો. મંગળવારે કલ્પ સવારની પાળીમાં શાળાએ ગયો હતો અને બપોરે ૧૨.૩૦ વાગ્યે ઘરે આવ્યો હતો. કલ્પએ તે સમયે ઘરે હાજર પિતા રીતેશભાઈને તે મિત્રો સાથે ક્રિકેટ રમવા માટે જવાનો હોવાનું જણાવી, ઘર નજીક આવેલા મેદાનમાં ગયો હતો.

ત્યારબાદ મોડે સુધી કલ્પ પરત નહિ આવતા પિતા તેને શોધવા માટે તળાવ પાસે પહોંચ્યા હતા. જ્યાં રીતેશભાઈએ હાજર કલ્પના મિત્ર લાલુને પૂછતાં, તેણે કલ્પ તળાવમાં પડી ગયેલો ક્રિકેટ બોલ લેવા માટે ગયો હોવાની કેફિયત રજૂ કરી હતી. ત્યારબાદ રીતેશભાઈએ તળાવ કિનારે પહોંચી તપાસ કરી હતી. જે તપાસમાં તળાવ કિનારેથી કલ્પની ચંપલ અને કપડાં મળી આવ્યા હતા. કલ્પ નજરે નહિ પડતા ગભરાઈ ગયેલા રીતેશભાઈએ સ્થાનિક રહીશોને જાણ કરી હતી. જે બાદ સ્થાનિક રહેશો પૈકીના એક તરવૈયા યુવાને તળાવના પાણીમાં તપાસ કરી કલ્પને તળાવના ઊંડા પાણીમાંથી બહાર કાઢ્યો હતો. કલ્પને ૧૦૮ એમ્બ્યુલન્સ મારફતે સારવાર માટે વલસાડની સિવિલ હોસ્પિટલમાં લઈ જવાયો હતો. જ્યાં ફરજ પરના તબીબે કલ્પને સારવાર મળે તે પહેલા જ મૃત જાહેર કર્યો હતો. જે બાબતે મૃતકના પિતા રીતેશભાઈ શાહે વલસાડ રૂરલ પોલીસ મથકમાં ફરિયાદ નોંધાવતા, પોલીસે અકસ્માત મોત મુજબ ગુનો નોંધી વધુ તપાસ હાથ ધરી હતી.