વલસાડનાં ગુંદલાવ ગામે રહેતા યુવક તેના મિત્રો સાથે ગામમાં આવેલા તળાવમાં નહાવા માટે ગયો હતો. જ્યાં યુવાન તળાવના પાણીમાંથી બહાર નહિ નીકળી શકતા તેનું ડુબી જવાથી મોત નીપજ્યું હતું. મૃતકની લાશને વલસાડ પાલિકાની ફાયર બ્રિગેડની ટીમની મદદથી બહાર કાઢવામાં આવી હતી.

મળતી માહિતી અનુસાર, વલસાડના ગુંદલાવ ગામના શકતિનગરમાં રહેતો ૧૮ વર્ષીય ભરતસીંગ ગામની જી.આઈ.ડી.સી વિસ્તારમાં આવેલી એક ખાનગી કામનીમાં નોકરી કરતો હતો. ભરતસિંગ બુધવારે તેના મિત્રો સાથે ગામના ભંડાર ફળિયામાં આવેલા પોણીયા તળાવમાં નહાવા માટે ગયો હતો. નહાવા માટે ગયેલા મિત્રો વચ્ચે તળાવમાં તરવા બાબતે શરત લગાડવામાં આવી હોવાનું જાણવા મળે છે. દરમિયાન ભરતસિંગ તળાવમાંથી બહાર નીકળી શક્યો ન હતો અને તળાવના પાણીમાં ગરક થઇ ગયો હતો. ઘટના અંગે સ્થાનિક રહીશોએ સરપંચને ઘટનાની જાણ કરી હતી. ગામના સરપંચે યુવકના મૃતદેહને શોધવા માટે વલસાડ પાલિકાના ફાયર બ્રિગેડની ટીમની મદદ માગી હતી. જે બાદ સ્થળ પર પહોંચેલી પાલિકાના ફાયર બ્રિગેડની ટીમે આશરે ૩૦ મિનિટમાં મૃતક યુવાનની લાશને શોધી કાઢી હતી. જે બાબતની જાણ વલસાડ રૂરલ પોલીસને કરાતા, પોલીસે અકસ્માત મોત મુજબ જાણવાજોગ ફરિયાદ નોંધવાની તજવીજ હાથ ધરી હતી.