સુરતનાં માંડવી તાલુકાનાં કોસાડી ગામ પાસેથી પસાર થતી તાપી નદીમાં ન્હાવા પડેલા ઝારખંડના વતની ૩૪ વર્ષીય યુવકનું પાણીમાં ડૂબી જવાથી કરુણ મોત નિપજ્યું હતું. ન્હાતી વખતે અચાનક ખેંચ આવી જતાં યુવક નદીના ઊંડા પાણીમાં ગરકાવ થઈ ગયો હોવાનું પ્રાથમિક તપાસમાં જાણવા મળ્યું છે.

મળતી માહિતી મુજબ, મૂળ ઝારખંડ રાજ્યનાં વેસ્ટ સિંઘભુમ જિલ્લાના મઝગાવ તાલુકાનાં બારાકાટાનો વતની મનોજભાઈ નંદલાલ પિગુવા રવિવારના રોજ સવારે ૬.૩૦થી ૯.૩૦ વાગ્યાના અરસામાં કોસાડીની સીમમાંથી પસાર થતી તાપી નદીમાં ન્હાવા માટે ગયો હતો. જ્યારે મનોજભાઈ નદીમાં ન્હાઈ રહ્યો હતો. તે દરમિયાન તેમને અચાનક ખેંચ (આંચકી) આવી હતી. જેના કારણે તેઓ પોતાનું સંતુલન ગુમાવી બેઠા અને નદીના પાણીમાં ડૂબવા લાગ્યા હતા. આસપાસ કોઈ હાજર ન હોવાથી કે મદદ મળે તે પહેલાં જ તેમનું પાણીમાં ડૂબી જવાથી મોત નીપજયું હતું. ઘટનાની જાણ થતાં માંડવી પોલીસની ટીમ ઘટના સ્થળે દોડી ગઈ હતી અને મૃતદેહને નદીમાંથી બહાર કાઢી પોસ્ટમોર્ટમ અર્થે મોકલી આપ્યો હતો. પોલીસે હાલ આ બનાવ અંગે અકસ્માત મોતની નોંધ કરી કાયદેસરની કાર્યવાહી હાથ ધરી હતી.