સુરત જિલ્લાનાં કામરેજનાં ચોર્યાસી ખાતે ક્રિકેટ રમતી વેળા નો બોલ આપવા બાબતે થયેલી બોલાચાલીમાં ઉશ્કેરાયેલા ઇસમે અન્ય એક પર સ્ટમ્પ વડે હુમલો કરી જાનથી મારી નાંખવાની ધમકી આપી હતી. મળતી માહિતી મુજબ, ચોર્યાસી ગામની સીમમાં વિજય હોટલની પાછળ આવેલા ક્રિકેટનાં મેદાનમાં યુવકો ક્રિકેટ રમી રહ્યા હતા. જેમાં રોનક વિજયભાઈ મોકરીયા (રહે.વરાછા ખોડીયાર નગર, સુરત) બેટીંગ કરી રહ્યો હતો અને વિરમ લખુભાઇ અઠાગ (રહે.જાપાન માર્કેટ, દિલ્લી ગેટ, સુરત) બોલીંગ કરી રહ્યો હતો.

વિરમે નાંખેલા બોલને રોનકે નો બોલ આપતા બંને વચ્ચે બોલાચાલી થઈ હતી. જે બાદ આ બોલાચાલીએ ઉગ્ર સ્વરૂપ ધારણ કર્યું હતુ. ઉશ્કેરાયેલા રોનકે વિરમ અઠાગને અપશબ્દો કહીને ઢિક્કા મુક્કીનો માર માર્યો હતો. એટલું જ નહીં, ક્રિકેટ રમવાનું સ્ટંપ ઉપાડીને વિરમનાં માથાનાં ભાગે મારી દીધું હતુ અને જાનથી મારી નાંખવાની ધમકી આપી હતી. ત્યારબાદ વિરમ લખુભાઈ અઠાગ દ્વારા સમગ્ર ઘટના અંગે કામરેજ પોલીસ મથકે ફરિયાદ નોંધાવવામાં આવી હતી. પોલીસે રોનક વિજયભાઈ મોકરીયા વિરૂદ્ધ ગુનો નોંધી તપાસ હાથ ધરી હતી.