વાપીમાં સુપર ગેસનાં ડિલર અને વેપારીનાં પુત્રને ચાલુ કારમાં ડ્રાઇવિંગ કરતી વખતે અચાનક ચક્કર આવતા વાપી-ધરમપુર માર્ગ પર નાનાપોંઢા પાસે ચિવલ ટાંકી નજીક અકસ્માત નડ્યો હતો. જેમાં કાર ચાલક સહિત 2 યુવાનો ઘાયલ થતા તેઓ વાપીની ખાનગી હોસ્પિટલમાં સારવાર માટે ખસેડાયા હતા. સુત્રો પાસેથી મળતી માહિતી અનુસાર, વાપીમાં સુપર ગેસની એજન્સી ધરાવતા વેપારી વહાબભાઈનો પુત્ર અબ્દુલ રહેમાન તેમના મિત્ર અરનાલાના શાહબુદ્દીન સાથે અંગત કામ માટે DD/03/F/1767 નંબરની કારમાં ગતરોજ નીકળ્યા હતા.

તે સમયે વાપી નજીક નાનાપોંઢા પાસે ચિવલ ટાંકી નજીક કાર ચાલક અબ્દુલને અચાનક ચક્કર આવી જતા કારના સ્ટેરીંગ પરથી કાબુ ગુમાવી દેતા કાર ધડાકાભેર રોડની કિનારે ઝાડ સાથે અથડાઈ હતી. જેમાં કારમાં સવાર બંને યુવકોને ફ્રેક્ચર સહિતની ઇજાઓ થઈ હતી. ઘટના બાદ આસપાસના લોકોએ વાપીમાં જમીયતે ઉલમાએ હિન્દ વાપી ટ્રસ્ટના ઇન્તેખાબ ખાન અને ઘાયલ યુવકોના પરિવારજનોને જાણકારી આપતા તેઓ તાત્કાલિક ઘટના સ્થળે પહોંચી ઘાયલોને ખાનગી હોસ્પિટલમાં સારવાર અર્થે મોકલવા સાથે ક્રેન મંગાવી કારને ટોઇંગ કરવાની કામગીરી હાથ ધરી હતી.