ભરૂચના હિંગલોટ ગામે દેત્રાલ પાટિયા પાસે રોડ ક્રોસ કરતી રિક્ષાને મિની ટ્રાવેલ્સ બસના ચાલકે ટક્કર મારતાં રિક્ષામાં સવાર પિતા-પુત્રને ગંભીર ઈજાઓ થઈ હતી. બનાવ અંગે મળેલ માહિતી અનુસાર, હિંગલોટ ગામનાં દેત્રાલ પાટિયા વિસ્તારમાં રહેતાં અતિઉલ્લાહ અબ્દુલ્લા પટેલ તેમના પિતા સાથે તેમની રિક્ષામાં તેમના ફૂટના ધંધાના સ્થળેથી રિક્ષામાં ફુટ ભરીને તેમના ઘરે ગયાં હતાં. ફુટ ખાલી કરી તેઓ બંને ગામમાં જ રહેતાં તેમના પુત્રને ત્યાં જમવા માટે જઈ રહ્યાં હતાં.

તે સમયે તેમના પિતા અબ્દુલ્લા પટેલ રિક્ષા ચલાવી રહ્યાં હતાં. તેઓ દેત્રાલ પાટિયા બસ સ્ટોપ પાસેથી રિક્ષા રોડ ક્રોસ કરાવી રહ્યાં હતાં તે સમયે દહેજ તરફથી આવતી એક મિની ટ્રાવેલ્સ બસનાં ચાલકે પુરઝડપે ધસી આવી તેમની રીક્ષાને ટક્કર મારી અકસ્માત સજર્યો હતો. ઘટનાના પગલે આસપાસના લોકોએ દોડી આવી તેમને રિક્ષામાંથી બહાર કાઢયા હતાં. ઈજાગસ્તોને તાત્કાલિક સારવાર માટે ભરૂચની પટેલ વેલફેર હોસ્પિટલમાં ખસેડવામાં આવ્યાં હતાં. અકસ્માત સર્જનાર મિની ટ્રાવેલ્સ બસ તેમજ તેમની રિક્ષાને ભારે નુકસાન થયું હતું. બનાવ સંદર્ભે ભરૂચ તાલુકા પોલીસે ગુનો નોંધી આગળની કાર્યવાહી હાથ ધરી હતી.