વાપીનાં ડુંગરા ગામે પટેલ ફળિયામાં આવેલ ગોડાઉનમાં મધરાતે આગ સળગી ઉઠતા ભારે દોડધામ મચી ગઇ હતી. જોકે આસપાસમાં રહેતા લોકોના જીવ તાળવે ચોટી ગયા હતા. તેમજ લશ્કરોએ ત્રણ ક્લાકની જહેમત બાદ આગને કાબુમાં લીધી હતી. મળતી માહિતી મુજબ, વાપીનાં ડુંગરા ગામે પટેલ ફળિયામાં જયેશ પટેલનું ભંગારનું ગોડાઉન આવેલું છે. રવિવારનાં રોજ મધરાતે અચાનક ગોડાઉનમાં આગ સળગી ઉઠી હતી. તેમજ જોતજોતામાં આગે આખા ગોડાઉનને લપેટમાં લઇ લેતા લોકોમાં ભારે દોડધામ મચી ગઇ હતી.

જયારે ગોડાઉન નજીક રહેતા લોકોનાં જીવ તાળવે ચોટી ગયા હતા. આગની જ્વાળા આકાશમાં દૂર દૂર સુધી ફેલાય જતા લોકોમાં ગભરાય મચી ગયો હતો.  આગને પગલે વાપી પાલિકા, નોટિફાઇડના પાંચથી વધુ બંબા ઘટના સ્થળે પહોંચી જઈ લશ્કરોએ આગને કાબુમાં લેવા કવાયત આદરી હતી. લગભગ ત્રણ ક્લાકની જહેમત બાદ આગ પર કાબુ મેળવાયો હતો અને ઘટનાને પગલે પોલીસ પણ દોડી આવી જરૂરી કાર્યવાહી હાથ ધરી હતી.