મનિષા એસ. સુર્યવંશી/તાપી : વાલોડ તાલુકાનાં અલગટ ગામનાં વૃંદાવન ફળીયામાંથી વગર પાસ પરમિટે દારૂનો જથ્થો સગેવગે કરવાની બાતમી મળતા તાપી એલ.સી.બી. પોલીસે એક ઈસમને ઝડપી પડ્યો હતો, જયારે બે ઈસમોને વોન્ટેડ જાહેર કરવામાં આવ્યા હતા. મળતી માહિતી મુજબ, તાપી એલ.સી.બી. પોલીસ સ્ટાફના માણસો ગુરુવારના રોજ ખાનગી તથા સરકારી વાહનોમાં ઈદના તહેવાર નિમિત્તે બંદોબસ્ત પેટ્રોલિયમમાં હતા.

તે દરમિયાન ફરતા ફરતા વાલોડ પોલીસ સ્ટેશન વિસ્તારમાં આવતા તેમને ખાનગી રાહે બાતમી મળી હતી કે, અલગટ ગામના વૃંદાવન ફળિયામાં રહેતો એક ઈસમ તેના ઘરે એક નંબર વગરની ક્રીએટા કાર જેમાં ઇંગ્લિશ દારૂનો જથ્થો ભરેલ છે જે સગેવગે કરવાની તૈયારીમાં છે જે બાતમીના આધારે પોલીસ સ્ટાફના માણસો બાતમી વાળી જગ્યા પર પહોંચતા ત્યાં એક કાર ઉભેલ હોય અને તેની પાસે એક ઈસમ ઉભેલ હતો જે કારનો દરવાજો ખોલી કંઈક કરતો હોય જેથી પોલીસે સ્થળ પર પહોંચી ઈસમને ઝડપી પાડ્યો હતો.

ત્યારબાદ પોલીસે તેનું નામ પૂછતા તેણે પોતાનું નામ, પિયુષ રમેશચંદ્ર ભૈયા (રહે.અલગટ ગામ, વૃંદાવન ફળિયું, તા.વાલોડ)ના હોવાનું જણાવ્યું હતું જોકે પોલીસે કારને જોતા આગળ તથા પાછળના ભાગે નંબર પ્લેટ કાઢી નાખેલ હોય જે કારના આગળના ગાર્ડ તથા બોનેટના ભાગે નુકસાન થયેલ જોવા મળ્યું હતું જોકે પોલીસે કારની ચાવી મેળવી કારનો દરવાજો ખોલી તેમાં ચેક કરતા પાછળની સીટ કાઢી નાખેલ હોય તથા ડીકીના ભાગે સ્ટેપની કાઢી તે જગ્યામાં ભારતીય બનાવટની ઇંગ્લિશ દારૂનો જથ્થો મળી આવ્યો હતો.

જોકે પોલીસે વધુ પૂછપરછ હાથ ધરતા જાણવા મળ્યું હતું કે, આ ઇંગ્લિશ દારૂનો જથ્થો તેનો સાળો હેમાંશુ ઉર્ફે બાબલો બળવંતભાઈ ચૌધરી (રહે.અંધાત્રી ગામ, આશ્રમ ફળિયુ, તા.વાલોડ) નાનો અને તેની સાથે બીજો એક ઈસમ જેના નામ સરનામાની ખબર નથી તે આ ઇંગલિશ દારૂ ભરીને કાર લાવી આપી ગયો હતો. જોકે આ દારૂનો જથ્થો ક્યાંથી લાવ્યા હતા અને કોને આપવાનો હતો તેની એણે જાણ ન હતી.

આમ પોલીસે સ્થળ ઉપરથી કાર જેની કિંમત રૂપિયા 10,00,000/- લાખ અને ભારતીય બનાવટની અલગ અલગ બ્રાન્ડનો ઇંગલિશ દારૂની 528 નંગ બોટલો જેની કિંમત રૂપિયા 1,29,600/- મળી કુલ રૂપિયા 11,29,600/-નો મુદ્દામાલ કબ્જે કર્યો હતો. બનાવ અંગે એ.એસ.આઈ. ગણપતસિંહ રૂપસિંહ બારીયાની ફરિયાદનાં આધારે ઝડપાયેલ ઈસમ વિરુદ્ધ ગુનો નોંધી આગળની વધુ કાર્યવાહી હાથ ધરવામાં આવી હતી, જયારે આ ગુનામાં સંડોવાયેલ બે ઈસમોને વોન્ટેડ જાહેર કરવામાં આવ્યા હતા.