સુરત જિલ્લાનાં માંડવી તાલુકાના ગોડસંબા ગામમાં એક ૩૮ વર્ષીય યુવકે ઓનલાઈન ગેમમાં આશરે ત્રણ લાખ રૂપિયા ગુમાવ્યા બાદ માનસિક તણાવમાં આવીને ઝેરી દવા પીને આપઘાત કરી લીધો છે. મૃતક અજયભાઈ બાબરભાઈ પટેલ માંડવી તાલુકાના ગોદાવાડી ગામના ચાલી ફળિયાનો રહેવાસી હતો. પોલીસ રિપોર્ટ અનુસાર, અજયભાઈ છેલ્લા એક મહિનાથી 'એવીએટર' નામની ઓનલાઈન ગેમ રમી રહ્યો હતો અને તેમાં તેણે ત્રણ લાખ રૂપિયા જ જેટલી મોટી રકમ ગુમાવી દીધી હતી. પૈસા હાર્યા બાદ તે ખૂબ જ તણાવમાં રહેતો હતો.

ગત તારીખ ૨૭મી માર્ચના રોજ સવારે અજયભાઈએ ગોડસંબા ગ્રાઉન્ડ ખાતે ઘાસમાં નાખવાની પેરાક્વીટ નામની ઝેરી દવા પી લીધી હતી. તેમને તાત્કાલિક સારવાર માટે માંડવીની આત્મીય હોસ્પિટલમાં ખસેડવામાં આવ્યો હતો. જ્યાંથી તેને વધુ સારવાર માટે સુરતની બેન્કર્સ હોસ્પિટલમાં દાખલ કરવામાં આવ્યો હતો. જોકે, સારવાર દરમિયાન ૨૮મી માર્ચના રોજ તેમનું મૃત્યુ થયું હતું. આ ઘટનાની જાણ તેના મોટાભાઈ અનીલભાઈ બાબરભાઈ પટેલે પોલીસને કરી હતી. માંડવી પોલીસે આ અંગે અકસ્માત મૃત્યુની ફરિયાદ નોંધીને તપાસ શરૂ કરી છે. તપાસની જવાબદારી હેડ ( કોન્સ્ટેબલ મુકેશભાઈ ધુલજીભાઈને સોંપવામાં આવી છે.