વાલોડ તાલુકાનાં ગોલણ ગામની સીમમાંથી પસાર થતાં વાપી શામળાજી હાઇવે પર ડમ્પર ટ્રક અચાનક રસ્તાની વચ્ચે ઊંભુ રાખી દેતા પાછળથી આવતા બાઈક સવાર ડમ્પરની પાછળનાં ભાગે અથડાતાં 26 વર્ષીય યુવકનું સ્થળ પર જ મોત નીપજ્યું હતું.

સુત્રો પાસેથી મળતી માહિતી અનુસાર, ગોલણ ગામની સીમમાંથી પસાર થતાં વાપી શામળાજી સ્ટેટ હાઇવે ઉપર હથુકા બસ સ્ટેન્ડથી બુહારી તરફ જતાં રોડ  પર અજયભાઈ રાકેશભાઈ ગામીત (ઉ.વ.21, રહે.દેગામા ગામ, હળપતિવાસ, વાલોડ) નાઓ પોતાની હોન્ડા યુનિકોન મોટર સાયકલ નંબર GJ/26/J/4470 લઈને ગોલણ ગામની સીમમાં આવેલ HIL સિમેન્ટ બ્લોક કંપનીમાં મજૂરી કામે જતા હતા.

તે સમયે રસ્તામાં ગોલણ ગામની સીમમાં ટાટા કંપનીનો ડમ્પર ટ્રક નંબર GJ/03/AZ/8340નાં ચાલકે પોતાનું ડમ્પર પુરઝડપે અને ગફલતભરી રીતે હંકારી લાવી અચાનક રોડની વચ્ચે લાવી ડમ્પર ટ્રકને અચાનક બ્રેક મારી ઉભો રાખી દેતા પાછળથી આવતા અજયભાઈ પોતાની હોન્ડા યુનિકોન મોટર સાયકલની સાથે ડમ્પરની પાછળના ભાગે અથડાઈ હતી.

જેથી અજયભાઈને શરીરે મોઢાનાં ભાગે તથા ગળાનાં ભાગે અને જમણા હાથ ઉપર ગંભીર ઈજાઓ પહોંચતા તેમનું ઘટના સ્થળ પર જ મોત નીપજ્યું હતું. જયારે ડમ્પર ટ્રકનો ચાલક પોતાનો ડમ્પર સ્થળ ઉપર છોડીને નાસી છૂટ્યો હતો. બનાવ અંગે વાલોડ પોલીસ ગુનો દાખલ કરી આગળની વધુ તપાસ હાથ ધરી હતી.