વ્યારા નગરમાં આવેલી માર્કેટ યાર્ડમાં દિવાળીનું 05 દિવસનું વેકેશન હોવાથી યાર્ડમાં ડાંગર સહિત અન્ય ખેત પેદાશોનીની આવક બંધ હતી. જોકે રવિવારે લાભ પાંચમનાં દિવસથી યાર્ડ રાબેતા મુજબ શરૂ થતાં વહેલી સવારથી ખેડૂતો ડાંગરની 500 જેટલી ગુણી લઇને આવ્યા હતા અને સાથે અન્ય ખેત પેદાશો પણ આવવાની શરૂ થઇ જતા ખેતીવાડી માર્કેટમાં ચહલપહલ વધી હતી. હજુ ડાંગરની આવકમાં વધારો થશે. તાપી જિલ્લા ખાતે આ વર્ષે ચોમાસુ સારૂ રેહયું હતું.

જોકે તાપી જિલ્લા ખાતે પિયત જમીન હોય આ વિસ્તારમાં ડાંગરનું વાવેતર વધુ કરાયું હતું. દિવાળી બાદ ખેડૂતો ડાંગરની કાપણી શરૂ કરી દીધી હતી. આ વર્ષે વરસાદ છેલ્લે સુધી રહ્યા ડાંગરનું પુષ્કળ ઉત્પાદન થયું છે. હાલ ઠેર-ઠેર ડાંગરની કાપણી થઈ રહી છે. ત્યારે વ્યારા નગરનાં માર્કેટિંગ યાર્ડમાં લાભ પાંચમના દિવસે 500 ગુણી ડાંગરની આવક થઈ હતી. આ અંગે APMCમાં પ્રમુખએ જણાવ્યું કે, હાલ ડાંગરની કાપણી ચાલી રહી હોય ધીમે ધીમે ડાંગરની આવકમાં વધારો થશે. આ ઉપરાંત માર્કેટ યાર્ડમાં ભીંડા, શાકભાજી સહિતનાં કઠોળની પણ સારી આવક જોવા મળી હતી.