સુરત જિલ્લાનાં માંગરોળ તાલુકાનાં સુરાલી ગામે રહેતો એક યુવક તેના મિત્રને લઈ તેના ઘરે ગઈ રહ્યો હતો. તે દરમિયાન રસ્તામાં સામે આવતી અન્ય એક મોટરસાઇકલ સાથે અકસ્માત સર્જાતા ચાલક યુવકનું ટૂંકી સારવાર દરમિયાન મોત નીપજ્યું હતું. મળતી માહિતી અનુસાર, માંગરોળનાં સુરાલી ગામે નિશાળ ફળિયામાં રહેતા પિંકેશ નટવરભાઈ વસાવા (ઉ.વ.23) નાઓ ગણેશ વિસર્જનનાં દિવસે વહેલી સવારે મિત્ર કિરણભાઈ પટેલ સાથે મોટરસાઇકલ નંબર GJ/19/AL/0605 લઈ સુરાલી ગામેથી રોસવાડ ગામે કિરણભાઈના ઘરે ગયા હતા.

ત્યારબાદ રોસવાડથી તડકેશ્વ જઈ રહ્યા હતા જોકે આ દરમિયાન તડકેશ્વ ગામની સીમમાં તડકેશ્વ રોસવાડ રોડ પર સામેથી આવતી મોટરસાઇકલ નંબર GJ/19/BB/3768 સાથે ધડાકા ભેર અથડાતા અકસ્માત થયો હતો. જોકે આ અકસ્માતમાં પિંકેશ વસાવાને શરીરે ગંભીર ઇજાઓ થતા તડકેશ્વની ખાનગી હોસ્પિટલમાં સારવાર હેઠળ ખસેડવામાં આવ્યા હતા જ્યાં તેમનું મોત નીપજ્યું હતુ. ઘટના અંગે મૃતકના મોટાભાઈ અંકુરભાઈએ મોટરસાઇકલ ચાલક વિરુદ્ધ ગુનો નોંધાવ્યો હતો.