નવસારીમાં આવેલા સંદલપોર ગામમાં શેરડીનાં ખેતરમાં એક મહિલાનું વીજ કરંટ લાગવાથી ઘટના સ્થળે જ મોત થતાં પંથકમાં ચકચાર મચી ગઈ હતી. સુત્રો પાસેથી મળતી માહિતી અનુસાર, સંદલપોર ગામમાં આવેલા એક અનાવિલ ખેડૂતનાં શેરડીનાં ખેતરમાં અનેક મજૂરો કામે આવતા હોય છે. ત્યારે રવિવારે વહેલી સવારે 10:00 વાગ્યાની આસપાસ બીજા અન્ય પુરુષ અને મહિલા મજૂરો સાથે સકીનાબેન પણ કામે ગયા હતા.

તે સમયે લઘુ શંકા કરવા માટે મહિલા બાજુમાં આવેલા આંબાના ખેતરમાં જતાં ત્યાં અગાઉથી તૂટીને પડેલા વીજતારને અકસ્માતે અડી જતા જોરદાર કરંટ લાગ્યા બાદ મહિલાનું ઘટના સ્થળે જ મોત નીપજ્યું હતું. જોકે બનાવને પગલે ગ્રામજનો ભેગા થયા હતા અને મહિલાને સારવાર આપાવે તે પહેલાં જ મોતને ભેટતા ગામમાં ચકચાર મચી ગઈ હતી. ઘટનાની જાણ મૃતક શકીનાબેનનાં પતિ ભીખુભાઇ ભગુભાઇ હળપતિ (રહે.સંદલપોર, વડ ફળિયુ) નાએ ગ્રામ્ય પોલીસમાં ફરિયાદ નોંધાવી હતી.