નવસારીનાં કલેકટર કચેરી સામે વિજલપોરનો ગોપાલક તેમના વાછરડા અને ગૌવંશ લઈ પસાર થતો હતો ત્યારે એક ટેમ્પો ચાલકે પૂરઝડપે હંકારી લાવી બે વાછરડાને ટક્કર મારતા એકનું મોત થયું અને એકને ઇજા થઇ હતી. બનાવ અંગે ગ્રામ્ય પોલીસ મથકે ફરિયાદ કરવામાં આવી હતી. સુત્રો પાસેથી મળતી માહિતી મુજબ, વિજલપોરનાં વિજયભાઈ ગોવિંદભાઈ ભરવાડે ફરિયાદ નોંધાવી હતી કે, તેઓ પશુપાલનનો ધંધા સાથે સંકળાયેલા છે અને જેઓ સોમવારનાં રોજ બપોરનાં સમયે તેમના વાછરડા અને ગૌવંશ લઈ બપોરનાં સમયે કાલિયાવાડી કલેકટર કચેરી પાસેથી પસાર થતા હતા.

તે દરમિયાન અચાનક ટેમ્પોનાં ચાલક ખુરશીદઅલી આફતાબઅલી (રહે.મલીકપોર,યુપી) નાએ ટેમ્પો પૂરઝડપે હંકારી લાવી જાહેર રોડ ક્રોસ કરતાં ગાયના બે વાછરડાને ટક્કર મારતા એક વાછરડાનું ઘટના સ્થળે મોત નીપજ્યું હતું. જ્યારે એકને માથાના ભાગે ગંભીર ઇજા પહોંચી હતી. વિજય ભરવાડે ગ્રામ્ય પોલીસમાં ટેમ્પો ચાલક ખુરશીદઅલી વિરુદ્ધ ફરિયાદ નોંધાવતા ગ્રામ્ય પોલીસે વધુ તપાસ હાથ ધરી હતી.