નવસારીનાં દશેરા ટેકરી સરસ્વતિ માતાજી મંદિરથી ટાગોરનગર સોસાયટી તરફ જતા રસ્તા પર રખડતી ગાયે ઘરકામ કરવા જતી મહિલાને અડફેટે લીધી હતી. જેથી મહિલા જમીન પર પડી જતા ઇજા પહોંચી હતી. તેને સારવાર અર્થે નવસારી સિવીલ હોસ્પિટલમાં લઈ ગયા હતા. બનાવની વિગત એવી છે કે, નવસારીનાં દશેરા ટેકરી વિસ્તારમાં મુખ્ય માર્ગે પાર્વતીબેન નાનુભાઈ રાઠોડ (ઉ.વ.આ.51) તેમના પરિવાર સાથે રહે છે. તેણી ટાગોર સોસાયટીમાં એક અનાવિલ સદગૃહસ્થને ત્યાં ઘરકામ કરવા માટે રાબેતા મુજબ બપોરે એક વાગ્યાના સમયે સરસ્વતી માતાજીના મંદિરથી ટાગોર સોસાયટીમાં જતી હતી.

તે દરમિયાન રસ્તામાં અચાનક ગાયે આવીને પાર્વતીબેન ઉપર હુમલો કરતા તેઓ ગભરાઈ ગયા હતા અને  ગાયે હુમલો કરતા પાર્વતીબેન માથા અને શરીરનાં ભાગે ઇજા થતા લોહીલુહાણ થઈ ગઈ હતી. અચાનક બનેલી આ ઘટનાથી બચાવો બચાવોની બૂમો પાડતા સ્થાનિકોએ ગાયને ત્યાંથી ભગાડી હતી. ઇજાગ્રસ્ત પાર્વતીબેનને સારવાર માટે નવસારી સિવિલ હોસ્પિટલમાં ખસેડ્યાં હતા. જોકે પાર્વતીબેનના પુત્રોએ હાલ ફરિયાદ નોંધાવાની ના પાડી હોવાની માહિતી મળી છે.