નર્મદાના ડેડીયાપાડા તાલુકાના કોલીવાડા (બોગજ) ગામે નજીવી બાબતમાં માથાકુટ થતા બેટ મારી મોતને ઘાટ ઉતારનાર ઈસમો સામે હત્યાનો ગુનો દાખલ થયો છે. મળતી માહિતી અનુસાર, દેડીયાપાડાના કોલીવાડા (બોગજ) નિશાળ ફળીયામાં રહેતા શંકરભાઇ પારસીંગભાઇ વસાવાએ આપેલી ફરિયાદ મુજબ, બોગજ ગામમાં રહેતા પ્રિતેશભાઇ નવલભાઇ વસાવા તથા અંકીતભાઇ નરપતભાઇ વસાવા બંનેએ ગામના લક્ષ્મણ ભાઇના ઘરે આવી લક્ષમણભાઇ પાસે દારૂ પિવા માટે રૂપિયા 100 માંગ્યા હતા.

જેથી લક્ષમણભાઇએ તેમને પૈસા આપવાની ના પાડેલી અને બંનેએ ક્રિકેટ રમવાના લાકડાના બેટ વડે લક્ષ્મણભાઇને મારી નાંખવાના ઈરાદે માર મારી ગંભીર ઈજાઓ પહોંચાડી હતી. જોકે 60 વર્ષના પારસીંગભાઇ ટેટીયાભાઇ વસાવાએ ઈજા પામનાર લક્ષ્મણભાઇને મારથી બચાવવા વચ્ચે પડતા બંનેએ મરનારને ક્રિકેટ રમવાના લાકડાના બેટથી માર મારી ગંભીર ઈજાઓ કરતા તેમનું સારવાર દરમિયાન મોત નીપજ્યું હતું જેથી પોલીસે પારસિંગભાઇની હત્યા મામલે પ્રિતેશ વસાવા અને અંકિત વસાવા વિરૂદ્ધ હત્યાનો ગુનો દાખલ કર્યો છે.