નર્મદા જિલ્લામાં આવેલ કરજણ ડેમનાં કાર્યપાલક ઇજનેર સિંચાઈ યોજના વિભાગ નંબર-4નાં  જણાવ્યા અનુસાર, નર્મદા જિલ્લામાં આવેલ કરજણ ડેમની પુર્ણ સપાટી 115.25 મીટર છે. સરકાર દ્વારા ચોમાસામાં નિયત કરાયેલા રૂલ લેવલ જાળવવાનું હોય છે. જે મુજબ આજરોજ સવારે 9 વાગ્યેની પરિસ્થિતિએ આ ડેમની સપાટી 107.38 મીટર પહોંચી હતી. જોકે તા.1 ઓગસ્ટ 2023 દરમિયાન ડેમની સપાટીને 107.55 મીટરનો રૂલ લેવલ જાળવવા માટે આજે બપોર 12:30 કલાકે ડેમનાં 3 દરવાજાને 1.4 મીટર ખોલીને કરજણ નદીમાં 16,128 ક્યુસેક પાણી છોડવામાં આવ્યું હતું.

ચોમાસા દરમિયાન ડેમનું લેવલ જાળવાઈ રહે તે માટેની નિયમિત કરવામાં આવતી આ પ્રક્રિયા છે. પાણીની આવક વધશે તો પાણી વધુ છોડવામાં આવશે. નદી કિનારે વસતા લોકો, ખેતી કરતા, ઢોર ચરાવતા લોકોને ત્યાં હાલ ડેમ નજીક ન જવા જણાવ્યું છે. નીચાણવાળા વિસ્તારના લોકોને સલામત સ્થળે જવા તંત્ર દ્વારા સૂચના અપાઈ છે. જયારે કરજણ ડેમ પર પાણી છોડાતા પોલીસ બંદોબસ્ત મૂકી દેવામાં આવ્યો છે.