બારડોલી તાલુકાનાં વધાવા ગામનાં તોકદા ફળિયામાં રહેતા રમણભાઈ મણીભાઈ ચૌધરી અને એમનો પરિવાર ખેતમજુરી સાથે પશુપાલનનો વ્યવસાય પણ કરે છે. મણીભાઈએ ઘરના વાડા પાછળ ખુલ્લામાં ગાય, ભેંસ રાખે છે. જોકે સવારે મણીભાઈ અને એમનો પરિવાર ઊઠી કામસર પશુઓને ઘાસચારો આપવા જતા દોઢ વર્ષની વાછરડી તરફડિયા ખાતી જોઈ હતી.

મણીભાઈને પહેલા તો સમજ ન પડી કે વાછરડી સાથે શું થઈ રહ્યું પછી વાછરડીને જોતા ગળાના ભાગે ઘા પડયા હતા અને પાછળનો ભાગ ખવાઈ ગયો હતો. એના પરથી ઘરના સભ્યો જાણી ગયા હતા કે આ શિકાર દીપડા દ્વારા જ કરવામાં આવ્યો છે. આમ, પરિવારે વનીકરણ રેંજના આર.એફ.ઓ.ને જાણ કરતા વનવિભાગના કર્મચારી ગામે જઈ પ્રાથમિક તપાસ કરતા દીપડાના આવવાના પગમાર્ક જોવા મળી આવ્યા હતા અને દોઢ વર્ષની વાછરડી મૃત અવસ્થામાં જોવા મળી હતી સાથે દીપડાએ બીજી એક આઠ મહિનાની વાછરડી પર હુમલો કર્યો હતો. વાછરડીના ગળા અને પેટના ભાગે દીપડાના નખોના નિશાન જોવા મળી આવ્યા હતા.