ગાંધીનગરનાં ચિલોડા હિંમતનગર હાઇવે ઉપર ચંદ્રાલા ગામ પાસે લક્ઝરી બસમાં ફોટો ફ્રેમના પ્લાયવુડ પાર્સલની આડમાં લઈ જવાતા વિદેશી દારૂના મોટા જથ્થા ઝડપી લીધો હતો અને એક લાખ ઉપરાંતનો મુદ્દામાલ કબ્જે કરી પાર્સલ મોકલનાર અને મંગાવનાર સામે ગુનો દાખલ કર્યો હતો. મળતી માહિતી મુજબ, ચિલોડા પોલીસની ટીમ ચંદ્રાલા પાસે વાહન ચેકિંગમાં હતી. તે સમયે હિંમતનગર તરફથી આવતી એક લક્ઝરી બસને ઉભી રાખી હતી અને તેમાં તપાસ કરતા ફોટો ફ્રેમના પાર્સલ મળી આવ્યા હતા.

જોકે પ્લાયવુડનાં પાર્સલની અંદર પોલીસને શંકા જતા તપાસ કરવામાં આવી હતી અને તેમાંથી વિદેશી દારૂની નાની મોટી 325 જેટલી બોટલ મળી આવી હતી. આ અંગે પોલીસે ચાલક કંડક્ટરને પૂછતા આ પાર્સલ રાજસ્થાનનાં હાઇવે ઉપરથી લોકેશ બાબુલાલ કોઈવાલ (રહે.ભીલવાડા, રાજસ્થાન)નાએ આપ્યા હોવાનું અને આ પાર્સલ અમદાવાદ ખાતે પહોંચાડવાના હોવાનું જણાવ્યું હતું. જેથી પોલીસે એક લાખ ઉપરાંતનો મુદ્દામાલ કબજે કરીને વિદેશી દારૂની બોટલો પાર્સલની આડમાં મોકલનાર અને મંગાવનાર સામે ગુનો દાખલ કરીને તેમની ધરપકડ માટેની આગળની કાર્યવાહી હાથ ધરવામાં આવી હતી.