ગાંધીનગર શહેર નજીક આવેલા રીંગ રોડ ઉપરનાં રણાસણ સર્કલ પાસે ચાલતા જઇ રહેલા રાહદારીને અડફેટે લઇને કોઇ અજાણ્યો વાહન ચાલક ફરાર થઇ ગયો હતો. જોકે ગંભીર રીતે ઘવાયેલા યુવાનને સારવાર માટે અમદાવાદ સિવિલ લઇ જવામાં આવ્યો હતો જ્યાં તેનું મોત નીપજ્યું હતું. મળતી માહિતી અનુસાર, રીંગરોડ ઉપર રણાસણ સર્કલ પાસે રાત્રીએ ચાલતા જઇ રહેલા અજાણ્યા યુવાનને અડફેટે લઇને કારનો ચાલક ફરાર થઇ ગયો હતો.

જેના પગલે આસપાસનાં લોકો ત્યાં દોડી આવ્યા હતા અને 108ની મદદથી યુવાનને તાત્કાલિક સારવાર માટે અમદાવાદ સિવિલ હોસ્પિટલ લઇ જવામાં આવ્યો હતો. જોકે સારવાર દરમિયાન તેનું મોત નીપજ્યું હતું. આ ઘટના અંગે ડભોડા પોલીસને જાણ કરવામાં આવતા પોલીસ ટીમ સિવિલ હોસ્પિટલ પહોંચી હતી અને આ આજાણ્યા યુવાનની ઓળખ માટે તપાસ આદરી હતી. જયારે બીજીબાજુ ફરાર થઇ ગયેલા અજાણ્યા કાર ચાલક સામે ગુનો દાખલ કરીને શોધખોળ માટેની મથામણ શરૂ કરવામાં આવી હતી.