સાપુતારા વઘઇ રાજ્યધોરી માર્ગ સ્થિત બારીપાડા ચીખલી વચ્ચે એક લકઝરી બસે પૂરઝડપે અને ગફલતભરી રીતે હંકારી લાવી 5 ગૌવંશને અડફેટે લેતાં મોત નીપજાવતા ગરીબ પશુ પાલકોને ભારે નુકસાન થયું હતું. મળતી માહિતી અનુસાર, ગતરોજ સાંજે 6 વાગ્યાનાં અરસામાં સાપુતારાથી વઘઇ તરફ પૂરઝડપે જઈ રહેલ ખાનગી લક્ઝરી બસ નંબર GJ/18/AV/6052નાં ચાલકે બારીપાડા ચીખલી વચ્ચે ચરિયાન કરી ઘરે પરત ફરતી ગૌવંશને અડફેટે લેતા ફફડાટ ફેલાયો હતો.

જોકે ગૌવંશને અડફેટે લીધા બાદ બસ માર્ગ સાઇડે ખાડામાં ખૂંપી જતા મોટી જાનહાની ટળી હતી, પરંતુ આ અકસ્માતમાં પાંચ ગૌવંશનું મોત નીપજતા ગરીબ પશુ પાલકને ભારે નુકસાન થતા કફોડી સ્થિતિ સર્જાઈ હતી. જોકે સાપુતારા પોલીસે ઘટના સ્થળે ધસી જઈ નુકસાનીનું પંચનામું કરી લકઝરી ચાલક વિરુદ્ધ ગુનો નોંધી કાયદેસરની કાર્યવાહી હાથ ધરી હતી.