અંકલેશ્વરનાં કાપોદ્રા ગામમાં ઝકરીયા પાર્કમાં આવેલા બંધ મકાનને તસ્કરોએ નિશાન બનાવીને રૂપિયા 55 હજાર રોકડ મળીને સોના-ચાંદીનાં દાગીનાની ચોરી કરી ફરાર થઈ ગયા હતા. જયારે ચોરીની જાણ થતાં જ મકાન માલિકે પોલીસ મથકમાં ફરિયાદ નોંધાવતા પોલીસે વધુ તપાસ હાથ ધરી હતી. મળતી માહિતી મુજબ, અંકલેશ્વરનાં કાપોદ્રા ગામમાં ઝકરીયા પાર્ક સોસાયટી આવેલી છે. જેમાં આસિફ ઈસ્માઈલ સોલંકી પોતાના પરિવાર સાથે રહે છે. તેઓ કોઈ કામ અર્થે પોતાનું મકાન બંધ કરીને પરિવાર સાથે બહાર ગામ ગયા હતાં. તે સમય દરમિયાન તસ્કરોએ રાત્રિના તેઓના બંધ મકાનને નિશાન બનાવ્યું હતું.

જોકે તસ્કરોએ તેમના મકાનમાં ત્રાટકી તિજોરી અને તેનું લોકર તોડી અંદર રહેલા રોકડા રૂપિયા 55 હજાર, પત્નીના સોના-ચાંદીમાં દાગીના અને પુત્રીના ગલ્લામાં ભેગા કરેલા રૂપિયા લઈને અંધારામાં પલાયન થઈ ગયા હતાં, જયારે બીજા સવારે આસિફ સોલંકી સવારે વહેલા ઘરે આવતા તેંમના રૂમનો દરવાજો ખુલ્લો જોતાં ચોરી થઈ હોવાનું અનુમાન લગાવી અંકલેશ્વર તાલુકા પોલીસ મથકમાં ચોરીની ફરિયાદ નોંધાવી હતી. મકાન માલિકની ફરિયાદનાં આધારે પોલીસ મથકનો સ્ટાફ તાત્કાલિક સ્થળ પર દોડી આવીને આસપાસ તપાસ કરી ડોગ સ્કોડ અને એફ.એસ.એલ.ની મદદ મેળવી તસ્કરોને પકડવાની  કામગીરી હાથ ધરી હતી.