ભરૂચનાં ઝઘડિયા તાલુકાનાં રાજપારડી નજીક ઝઘડિયા તરફ જવાના માર્ગ પર ભુંડવા ખાડી પર નવા બનેલ પુલ પરથી એક કાર નીચે પ‍ડી જવા પામી હતી. બનાવની વિગત એવી છે કે, ઝઘડિયા તરફથી આવી રહેલ એક કાર ભુંડવા ખાડીનાં નવા બનાવેલ પુલના રસ્તા પરથી પસાર થઇ રહી હતી ત્યારે એકાએક ચાલકે સ્ટેરીંગ પરનો કાબુ ગુમાવતા કાર રોડની દિવાલ ઓળંગીને જુના રોડ પર પડી હતી. આ ઘટનામાં સદભાગ્યે કોઇ જાનહાનિ થઇ ન હતી. ઉલ્લેખનીય છે કે, ભુંડવા ખાડીનો જુનો પુલ ખુબ નીચો હોવાથી ચોમાસામાં પુલ પરથી પાણી જતું હોવાનું ઘણીવાર બનતું હોય છે.

આ ધોરી માર્ગને ચાર માર્ગીય બનાવવાની કામગીરી અંતર્ગત જુના પુલની બાજુમાં નવો પુલ બનાવાઇ રહ્યો છે. નવો પુલ જુના પુલ કરતા પ્રમાણમાં ખાસો એવો ઉંચો બનાવાયો છે. જેથી પુલની બંને તરફ રોડ ઢાળવાળો બન્યો છે. રોડ ઢાળવાળો બનતા બંને તરફ વોલ બનાવીને રેલિંગ બનાવાઇ છે. દરમિયાન નવા પુલ પર જવાના માર્ગ પરથી પસાર થતી કારના ચાલકે સ્ટેરીંગ પરથી કાબુ ગુમાવતા કાર નવા પુલના રસ્તા પરથી જુના માર્ગ પર પડી હતી. જોકે સદભાગ્યે કોઇ જાનહાનિ થઇ નથી.