અંકલેશ્વર હવા મહેલ રોડ પર અનમોલ પ્લાઝા સામે રોડ બાજુમાં સુતેલા મજુર પર કાર ફરી વળી હતી. જોકે કાર ચાલક અકસ્માત સર્જી ફરાર થઇ ગયો હતો અને ગંભીર રીતે ઇજા પામેલ મજુર સારવાર અર્થે ખસેડાયો પણ સારવાર દરમિયાન મોત નીપજ્યું હતું. ઘટના અંગે બી-ડિવિઝન પોલીસે ગુનો નોંધી વધુ તપાસ હાથ ધરી હતી. સુત્રો પાસેથી મળતી માહિતી મુજબ, અંકલેશ્વરનાં જુના નેશનલ હાઇવે નંબર 8 પર હવા મહેલ પાસે આવેલા અનમોલ પ્લાઝા સામે રોડ પર સલીમ મહોમદ શેખ નામનો શ્રમિક રોડ સાઈડમાં ખુલ્લામાં સૂતો હતો.

તે દરમિયાન અજાણ્યા કાર ચાલકે કાર ગફલતભરી રીતે હંકારી લાવી તેના પર ચઢાવી ગંભીર ઇજા પહોંચાડી ફરાર થઇ ગયો હતો. અકસ્માતમાં ઘાયલ સલીમ શેખનાં મિત્ર અને સાથી શ્રમિકોએ સલીમ પટેલને ગંભીર ઇજા સાથે સારવાર અર્થે 108ની મદદથી ભરૂચ સિવિલ હોસ્પિટલ ખાતે ખસેડાયો હતો. જ્યાં તેનું સારવાર દરમિયાન મોત નીપજ્યું હતું. અકસ્માત અંગે આનંદ શવજી રાજગુરુએ ફરિયાદ આપતા અંકલેશ્વર શહેર બી-ડિવિઝન પોલીસ મથકે ગુનો નોંધી વધુ તપાસ હાથ ધરી હતી.