ભરૂચનાં ઝઘડીયા તાલુકાના એક ગામનો પરિવાર છૂટક મજૂરી તથા ઘરકામ કરી તેમના પરિવારનો ગુજરાત ચલાવે છે. આ પરિવારની એક સગીર યુવતીને ગત તા.06/11/2021ના રોજ કુંવરપુરા ગામનો નરેશ ગણપત વસાવા નામનો યુવક લગ્નની લાલચ આપી ભગાડી ગયો હતો. સગીરાના પરિવારજનોએ તેની સગીર પુત્રીને કોણ ભગાડી ગયો છે તેની તપાસ કરતા કુંવરપુરા ગામનો નરેશ તેમની પુત્રીને બાઈક પર બેસાડી ભગાડી ગયો હોવાનું જાણવા મળ્યું હતું. જોકે ગત 16/11/202ના રોજ સગીરાના પરિવારજનો કુંવરપુરા ગામે નરેશના ઘરે ગયા હતા.

તે સમયે યુવકનું ઘર બંધ હતું અને જાણવા મળ્યું હતું કે , નરેશનો પરિવાર નરોલી ગામે ઈટના ભઠ્ઠા પર મજૂરી કરવા ગયા છે. સગીરાના પિતા તેજ દિવસે ઈંટોના ભઠ્ઠા પર તેની સગીર પુત્રી પરત લેવા માટે ગયા હતા. ઈટોના ભઠ્ઠા પર સગીરાને ભગાડી જનાર નરેશના પિતા ગણપતભાઇ તથા તેનો મોટો ભાઈ મળ્યા હતા. સગીરાના પિતાએ તેમની સગીર પુત્રી પરત સોંપી દેવાની માંગણી કરી હતી પરંતુ નરેશના પિતા ગણપતભાઇ તથા તેનો ભાઈ ઉશ્કેરાઈ જઈ સગીરાના પિતાને માં-બેન ગાળો બોલી જાનથી મારી નાખવાની ધમકી આપી હતી. જેથી સગીરાના પિતાએ નરેશ ગણપત વસાવા, ગણેશ ગણપત વસાવા અને ગણપત વસાવા (ત્રણે રહે. કુંવરપુરા તા. ઝઘડિયા) વિરુદ્ધ ફરિયાદ નોંધાવી હતી.