અંક્લેશ્વર રહેતો શખ્સ તેની ભાણેજ સાથે બાઇક પર વડોદરા જઇ રહ્યો હતો. તે સમયે ભરૂચ હાઇવે ઉપર વગુસણા ગામ પાસેથી પસાર થતાં સમયે એક ટ્રક ચાલકે તેમની બાઇકને ટક્કર મારતાં ફુઆ-ભાણેજ બંને  જમીન પર પટકાયાં હતાં. જોકે આ અકસ્માતમાં ફુઆનું માથામાં ગંભીર ઇજાઓ થવાને કારણે સ્થળ પર જ મોત નીપજ્યું હતું. બનાવ અંગે નબીપુર પોલીસે ગુનો નોંધી આગળની કાર્યવાહી હાથ ધરી હતી. મળતી માહિતી અનુસાર, હરિયાણાનાં વતની અને હાલમાં અંક્લેશ્વરની રાજપીપળા ચોકડી પાસે આવલાં ભાવના ફાર્મ ખાતે રહેતાં ઓમપ્રકાશ કિશોરલાલ શર્માની સાળાની પુત્રી આરતી શાંતીલાલ હજારીલાલને લઇને અંક્લેશ્વરથી બાઇક પર કામ અર્થે વડોદરા જવા માટે નિકળ્યાં હતાં.

તે દરમિયાન ભરૂચ હાઇવે પરથી પસાર થતાં સમયે વગુસણા ગામનાં પાટિયા પાસેથી પસાર થતાં સમયે તેમની બાઇક બીજા નંબરનાં ટ્રેક પર ચાલી રહી હતી. ત્યારે પહેલાં ટ્રેક પર ચાલતી ટ્રકનાં ચાલકે અચાનક બીજા નંબરનાં ટ્રેક પર આવી તેમની બાઇકને ટક્કર મારતાં બંને રોડ પર ફેંકાઇ ગયાં હતાં. જેમાં ફુઆ ઓમપ્રકાશને માથામાં ગંભીર ઇજાઓ થતાં તેમનું સ્થળ પર જ કમકમાટીભર્યું મોત નીપજ્યું હતું. બનાવ અંગે મૃતકનાં ભાઇ સિતારામ શર્માએ નબીપુર પોલીસ મથકે ફરિયાદ નોંધાવી હતી.