દિલ્હીથી મુંબઇ જઇ રહેલ ઇન્ડિગો ફ્લાઇટમાં એક મહિલા મુસાફરની છેડતી કરવાના આક્ષેપ સાથે એક પ્રોફેસરની ધરપકડ કરવામાં આવી છે. આ પ્રોફેસર પર એક 24 વર્ષની ડોક્ટર યુવતીની જાતીય સતામણીનો આક્ષેપ કરવામાં આવ્યો છે. આ યુવતીની ફરિયાદ બાદ આરોપી પ્રોફેસરની ધરપકડ કરવામાં આવી છે. એક વેબ પોર્ટલ પરથી મળતી માહિતી મુજબ આ બનાવ ઇન્ડિગો એરલાઇન્સની ફ્લાઇટમાં બની હતી. આરોપી પ્રોફેસર રોહિત શ્રીવાસ્તવ (ઉ.વ. 47) ની પોલીસે ધરપકડ કરી છે. આ આરોપીની ન્યાયીક કસ્ટડી પણ આપવામાં આવી છે. જોકે ત્યાર બાદ તેના જામીન મંજૂર થયા હોવાની વિગતો જાણવા મળી છે.

આ અંગે સહાર પોલીસે આપેલ વિગતો અનુસાર પટના ખાતે રહેનારા રોહિત શ્રીવાસ્તવ અને એ યુવતીની સીટ એક બીજાની બાજુમાં હતી. બુધવારે 26મી જુલાઇના રોજ વહેલી સવારે 5:30 વાગે આ ફ્લાઇટ દિલ્હીથી મુંબઇની દિશામાં રવાના થઇ હતી. જોકે ફ્લાઇટ મુંબઇમાં લેન્ડ થાય એ પહેલાં જ આરોપીએ આ યુવતીની છેડતી કરી હોવાની જાણકારી પોલીસે આપી હતી.આરોપીએ બદઇરાદાથી તેને સ્પર્ષ કર્યો હોવાની ફરિયાદ યુવતીએ કરી હતી. આ વાત યુવતીને ધ્યાનમાં આવતા તેણે એ વ્યક્તિનો વિરોધ કરતાં બંને વચ્ચે વિવાદ થયો હતો. વિવાદ વધી જતાં ફ્લાઇટના કર્મચારીઓએ મધ્યસ્થી કરી ઝગડો બંધ કરવાનો પ્રયત્ન કર્યો હતો. ફ્લાઇટ લેન્ડ થયા બાદ અધિકારી આ બંનેને સહાર પોલીસ સ્ટેશન લઇ ગયા હતાં. ત્યારે આરોપી સામે ફરિયાદ નોંધવામાં આવી હતી.

ઉપરાંત આ યુવતીનો જવાબ પણ પોલીસે નોંધી લીધો હતો.આરોપી સામે કલમ 354 અને 354 એ અંતર્ગત ગુનો દાખલ કરવામાં આવ્યો છે. ફરિયાદ બાદ આરોપીની ધરપકડ કરવામાં આવી હતી તેવી જાણકારી પોલીસે આપી છે. ત્યાર બાદ આ આરોપીને કોર્ટ સામે રજૂ કરવામાં આવ્યો હતો. ત્યારે તેને ન્યાયીક કસ્ટડી આપાવામાં આવી હતી. જોકે ત્યાર બાદ આરોપીને જામીન પણ મળી ગયા હતાં. જોકે અત્યાર સુધી આ અંગે ઇન્ડિગો એરલાઇન્સ દ્વારા કોઇ ખૂલાસો કરવામાં આવ્યો નથી.