ઝીલ પટેલ/બારડોલી : સુરત જિલ્લાની બારડોલી નગરપાલિકામાં ભાજપ પક્ષમાંથી સસ્પેન્ડ કરાયેલા વોર્ડ નં.1ના નગરસેવક દક્ષેશ શેઠ અને માજી નગર સેવક વર્ષા ભંડારીના પતિ અશોક ભંડારી વચ્ચે વાહન પાર્કિંગ મુદ્દે છુટ્ટા હાથની મારામારી થઈ હતી. જોકે મારમારીનો વીડિયો વાઇરલ થતા સમગ્ર ઘટના ટોક ઓફ ધી ટાઉન બની હતી.

બારડોલી નગરપાલિકા વર્તમાન નગરસેવક અને થોડા સમય પૂર્વે જ અશ્લીલ વિડીયો વાઇરલ થવાની ઘટનાને લઇ પક્ષના પ્રાથમિક સભ્ય પદેથી સસ્પેન્ડ થયેલા દક્ષેશ શેઠના ડ્રાઈવર અનુપસિંહ રાજપૂત તેમની કાર ગાંધી રોડ પર સ્થિત ઘરની સામે આવેલા રુદ્ર એવન્યુમાં કાર પાર્કિંગ કરી રહ્યા હતા તે સમયે તેમની જ સોસાયટીમાં રહેતાં ભાજપના ડાંગ જિલ્લાના મહિલા મોરચાના પ્રભારી અને માજી નગરસેવક વર્ષા  ભંડારીનાં પતિ અશોક ભંડારી સાથે પાર્કિંગ બાબતે બોલાચાલી થયા બાદ બંને વચ્ચે ઝપાઝપી થઈ હતી. 

આ દરમ્યાન વચ્ચે પડેલા દક્ષેશ શેઠ અને અશોક ભંડારી વચ્ચે પણ ઉગ્ર ગાળાગાળી વાત મારામારી સુધી પહોંચી ગઈ હતી અને બંનેએ કમરપટ્ટો કાઢી એકબીજા પર ઉગામ્યો હતો.આ સમગ્ર મારમારીની ઘટના સી.સી.ટી.વી.માં કેદ થઈ હતી.જે વીડિયો સોશ્યલ મીડિયા પર વાયરલ થઈ જતા સમગ્ર મામલો બારડોલી ટાઉન પોલીસ મથકમાં પહોંચતા મોડી સાંજે પોલીસ દ્વારા બંનેની લેખિત ફરિયાદ લઈ આગળની તપાસ હાથ ધરવામાં આવી રહી છે.