વાપીનાં મચ્છી માર્કેટમાં આવેલી મંડપ ડેકોરેશનની દુકાન અને ગોડાઉનમાં રાત્રે આગ લાગતા ભારે દોડધામ મચી ગઇ હતી. જયારે બાજુમાં આવેલી ચાલીમાં રહેતા રહીશો બહાર નિકળી ગયા હતા. જયારે ફાયર જવાનોએ આગ પર કાબુ મેળવ્યો હતો. સુત્રો પાસેથી મળતી માહિતી મુજબ, વાપીના મચ્છી માર્કેટમાં અજમેરી મંડપ ડેકોરેશન નામક દુકાન આવેલી છે. જેમાં ગતરોજ રાત્રે અચાનક આગ સળગી ઉઠી હતી અને જોતજોતા ગોડાઉન પણ લપેટમાં આવી જતા લોકોમાં અફરાતફરી મચી ગઇ હતી.

જયારે આગ વધુ તિવ્ર બનતા બાજુમાં આવેલી ચાલી પણ લપેટમાં આવી જવાની ભિતીને લઇ લોકો બહાર નિકળી ગયા હતા. આગને પગલે પાલોકાના બે બંબા ઘટના સ્થળે પહોંચી ગણતરીના ક્લાકોમાં આગ પર કાબુ મેળવ્યો હતો. પરંતુ આ આગમાં દુકાન અને ગોડાઉન સ્વાહ થઇ જતા અજમેરી પરિવારની મહિલા અને સભ્યો ચોધાર આસુએ રડતા જોવા મળ્યા હતા. જોકે કોઇ જાનહાની થઇ ન હતી અને આગને કારણે વીજપ્રવાહ બંધ કરી દેવાયો. પરંતુ આગ કયા કારણોસર લાગી તે અંગે કોઇ કારણ બહાર આવ્યું નથી. આગમાં માલસામાન બળીને ખાખ થતાં ભારે નુકશાન થયું હતું.