વાપીના ચણોદ સ્થિત એક મોલમાં બે કારના કાચ તોડી ચોરીનો પ્રયાસ કરતા ત્રણ ઇસમો સીસીટીવીમાં કેદ થયા હતાં. સેલવાસ ઉમરકુંઇ રોડ ઉપર રહેતા પ્રિતેશભાઇ કાપડી સોમવારે રાત્રે વાપી ચણોદ સ્થિત ડી-માર્ટ મોલમાં પોતાના પરિવાર અને એક મિત્રના પરિવાર સાથે અર્ટીગા કાર લઇને ખરીદી કરવા માટે આવ્યા હતા. ખરીદી કર્યા બાદ સામાન ડીકીમાં અને એક બેગ પાછળની સીટ ઉપર મૂકી એક સામાન ભૂલી જતા ફરીવાર તેઓ મોલમાં ગયા હતા. જ્યાંથી 20 મિનિટ બાદ પરત ફરતા પાછળનો કાચ તૂટેલી હાલતમાં જોવા મળ્યો હતો. જયારે તપાસમાં એક અમેઝ કારનો કાચ પણ તૂટેલી હાલતમાં જોવા મળતા આ અંગે મોલના કર્મી સાથે તેમણે વાત કરી હતી. ત્યારબાદ સીસીટીવીની ચકાસણી કરતા ત્રણ ઇસમો પૈકી બે ઇસમ આજુબાજુ જોતા અને ત્રીજો ગિલોડથી કાચ તોડતા કેદ થઇ ગયો હતો. પરંતુ અજાણ્યા તસ્કરો કોઇપણ વસ્તુ ચોરી કરી શક્યા ન હતા. બનાવ અંગે પોલીસ ફરિયાદ નોંધી તપાસ હાથ ધરી હતી.