વલસાડ જિલ્લાને અડીને આવેલા સંઘ પ્રદેશ દાદરા નગર હવેલીના નરોલી ખાતે આવેલી ટોપસાઈલ કંપનીમાં ગતરોજ અચાનક આગ લાગી હતી. ટોપસાઈલ કંપનીમાં અચાનક ધુમાડા દેખાતા કંપનીમાં કામ કરતા કામદારોમાં દોડધામ મચી ગઇ હતી. નરોલી ખાતે આવેલી કંપનીમાં અચાનક આગની ઘટના બનતા આજુબાજુમાં આવેલી કંપનીઓના કામદારો પણ મદદે દોડી આવ્યા હતા. ઘટનાની જાણ સેલવાસ ફાયર ફાઈટરની ટીમને થતા સેલવાસના 3 ફાયર ફાઈટરોની ટીમે ઘટના સ્થળે પહોંચી આગ ઉપર કાબુ મેળવ્યો હતો. આગની ઘટનાને લઈને કંપનીના અધિકારીઓએ કંપનીમાં કામ કરતા કામદારોને સુરક્ષિત રીતે બહાર કાઢી લીધા હતા. આગની ઘટનામાં કોઈપણ પ્રકારની જાનહાની થઈ ન હતી. ટોપસાઈલ કંપનીમાં અચાનક આગ લાગવાનું કરણ હજુ જાણી શકાયું નથી.