વલસાડનાં શાકભાજી માર્કેટનાં એક દુકાનમાં અચાનક આગ લાગતા દોડધામ મચી ગઇ હતી. બંધ દુકાનમાં મોડી રાતે અંદરથી આગની જ્વાળાઓ બહાર આવતા આસપાસના લોકોએ ફાયર વિભાગને જાણ કરી હતી. સાઈકૃપા નામની આ દુકાનમાં અંદરથી આગ લાગેલી હોવાથી આસપાસના લોકો પણ મોટી સંખ્યામાં સ્થળ પર હાજર થઇ ગયા હતા. 

 

 

 

વલસાડનાં શાકભાજી માર્કેટમાં આવેલી એક દુકાનમાં આગ લાગતા ઘટનાની જાણ ફાયર-બ્રિગેડને કરાતા  વલસાડ ફાયર-બ્રિગેડની ટીમ સ્થળ પર પહોંચી અને આગ પર કાબૂ મેળવવા પ્રયાસ કરવા લાગી હતી. પરંતુ  દુકાન અંદરથી બંધ હોવાથી અને આગ દુકાનની અંદર લાગી હોવાથી ફાયર-બ્રિગેડના જવાનોએ  પહેલા તો દુકાનના શટર તોડી અને ત્યારબાદ આગ પર પાણીનો મારો ચલાવ્યો હતો. આખરે ભારે જહેમત બાદ ફાયર-બ્રિગેડના જવાનોએ આગ પર કાબુ મેળવી લીધો હતો. આ ઘટનામાં કોઈપણ પ્રકારની ઈજા કે જાનહાનિ નહીં થતા લોકોએ હાશકારો અનુભવ્યો.

 

 

 

શાકભાજીની આ દુકાનમાં આગ શોર્ટ-સર્કિટથી લાગી હોવાનું મનાઈ રહ્યું છે. પરંતુ સમય રહેતા ફાયર-બ્રિગેડના જવાનોએ તાત્કાલિક સ્થળ પર પહોંચીને આગ પર કાબૂ મેળવતા આસપાસની દુકાનોમાં પણ આગ પ્રસરતી અટકાવી હતી જેથી આગની મોટી દુર્ઘટના ટળી ગઈ હતી.