મનિષા એસ. સુર્યવંશી/તાપી : સોનગઢનાં વાંકવેલ પરોઠા હાઉસ પાસેના લક્કડકોટ તરફથી આવતાં રોડ ઉપરથી બે યુવકોને બાઈક પર દારૂ લઈ જતાં ઝડપી પાડ્યા હતા. મળતી માહિતી મુજબ, સોનગઢ પોલીસ સ્ટાફના માણસો પેટ્રોલીગમાં નીકળ્યા હતા તે દરમિયાન ખાનગી રાહે બાતમી મળી હતી કે, લક્કડકોટ સોનગઢ રોડ તરફથી એક બાઈક ચાલક બાઈક પર દારૂ લઈ પસાર થનાર છે. જે બાતમીના આધારે પોલીસ સ્ટાફના માણસો વાંકવેલ ગામે લક્કડકોટ તરફથી એક બાઈક નંબર GJ/19/BG/2668 આવતાં જોઈ તેણે ઈશારો કરી બાઈક ઉભો રખાવી હતી.

ત્યારબાદ પોલીસે બાઈક ચાલકનું નામ પૂછતા તેણે પોતાનું નામ, વિશાલ નવીનભાઈ ચૌધરી (રહે.બોરીગાળા ગામ, બેડી ફળિયું, તા.માંડવી) અને બાઈક પાછળ બેસેલનું નામ પૂછતાં તેણે પોતાનું નામ કુલીન શાંતુભાઈ ચૌધરી (બંને રહે.બોરીગાળા ગામ, બેડી ફળિયું, તા.માંડવી)નાં હોવાનું જણાવ્યું હતું. ત્યારબાદ પાછળ બેસેલ યુવક પાસેની થેલીમાં પોલીસે જોતા તેમાં ભારતીય બનાવટની વિદેશી બિયર મળી આવી હતી. આમ, પોલીસે બાઈક જેની કિંમત રૂપિયા 30 હજાર, વિદેશી બિયર અને 1 નંગ મોબાઈલ મળી કુલ રૂપિયા 41,600/-નો મુદ્દામાલ કબ્જે કર્યો હતો. બનાવ અંગે પોલીસ કર્મચારીની ફરિયાદના આધારે ઝડપાયેલ બંને યુવકો વિરુદ્ધ ગુનો નોંધી કાર્યવાહી હાથ ધરવામાં આવી હતી.