ઉપરવાસમાં પડેલાં ભારે વરસાદનાં કારણે ઉત્તર ગુજરાતની જીવાદોરી સમાન ધરોઇ ડેમમાંથી આજે બે ગેટ ખોલી નવ હજારથી વધુ ક્યુસેક પાણી સાબરમતી નદીમાં છોડવામાં આવ્યું છે. સંત સરોવર ભરાઈ જવાને કારણે તેમાંથી પાણી છોડવામાં આવતા ગાંધીનગર તાલુકાનાં ભાટ સુધીનાં ગામોને તંત્ર દ્વારા એલર્ટ કરી દેવામાં આવ્યા છે. ગ્રામજનોને નદીમાં નહીં ઉતારવા માટે તંત્ર દ્વારા તાકિદ કરવામાં આવી છે. નદીમાં હાલ ઊંડા ખાડામાં પાણી હોવાથી તે જોખમી હોવાનું પણ તંત્ર માની રહ્યું છે. ગાંધીનગર જિલ્લામાંથી પસાર થતી સાબરમતી નદીમાં આ વર્ષે પણ ઉપરવાસમાં સારા એવા વરસાદને કારણે પાણી આવ્યું છે. જેના કારણે ગાંધીનગરમાં સાબરમતી નદી ઉપર બનાવવામાં આવેલું સંત સરોવર છલોછલ ભરાઈ ગયું છે.

ધરોઈ ડેમમાંથી 9236 ક્યુસેક પાણી છોડવામાં આવતા તે મોડી રાત સુધીમાં ગાંધીનગર પહોંચી જશે. જેના પગલે હાલ ભરાઈ ગયેલા સંત સરોવરમાંથી બે દરવાજા ખોલીને પાણી છોડવામાં આવી રહ્યું છે. હજી પણ ઉપરવાસમાંથી પાણીનો આવરો ચાલુ રહેતા સંસરોવરના વધુ દરવાજા ખોલીને પાણી છોડવામાં આવશે. આ સ્થિતિને કારણે સાબરમતી નદીમાં પાણી આવવાથી ગાંધીનગર તાલુકાના ધોળેશ્વર, શાહપુર, વલાદ, કરાઈ, રાંદેસણ, રાયસણ, કોબા, નભોઈ, ભાટ અને કોટેશ્વર ગામના ગ્રામજનોને સાબરમતી નદીમાં નહીં ઉતરવા માટે તંત્ર દ્વારા તાકિદ કરવામાં આવી છે.