રાજકોટમાં હાર્ટ એટેકથી મોતનો સિલસિલો અટકવાનું નામ જ લેતો નથી. રેલનગર, લોધીકાના પાળ ગામે અને ગાંધીગ્રામ વિસ્તારમાં રહેતા યુવાન સહિત ત્રણનાં હાર્ટએટેકથી મૃત્યુ નિપજતા પરિવારમાં શોકની લાગણી છવાઈ હતી. રેલનગરમાં આસ્થા ચોક પાસે ટેનામેન્ટમાં ભાડે રહેતાં ભાવેશભાઈ ધીરૂભાઈ ગોહેલ (ઉ.વ.27) એકાએક બેભાન થઈ જતા સિવિલમાં ખસેડાયા હતા. જયાં તેનું મૃત્યુ નિપજયું હતું. મૃતક ઘર નજીક દુધનો ધંધો કરતા હતા.

મૃતકને હાર્ટ એટેક આવ્યાનું પ્ર.નગર પોલીસની પ્રાથમિક તપાસમાં ખુલ્યું છે. બીજા બનાવમાં લોધીકાના પાળ ગામે વાડીમાં રહી ખેતમજુરી કરતા મુળ દાહોદનાં કેશુભાઈ સરતાનભાઈ મોહનીયા (ઉ.વ.૫૧) રાત્રે એકાએક બેભાન થઈ જતા રાજકોટ સિવિલમાં ખસેડાયા હતા. જયાં તેનું મૃત્યુ નિપજયું હતું. મૃતકને હાર્ટએટેક આવી ગયાનું લોધીકા પોલીસની પ્રાથમિક તપાસમાં ખુલ્યુ છે. ત્રીજા બનાવમાં ગાંધી ગ્રામના ભારતીનગરમાં રહેતા રામજીભાઈ વાઘજીભાઈ સોલંકી (ઉ.વ.46) ઘરે હતા ત્યારે ઉલ્ટી થયા બાદ બેભાન થઈ જતાં સિવિલમાં ખસેડાયા હતા. જયાં તેનું મૃત્યુ નિપજયું હતું. મૃતકને હાર્ટ એટેક આવી ગયાનું તેના પરિવારજનોએ જણાવ્યું હતું. ગાંધીગ્રામ પોલીસે વધુ તપાસ હાથ ધરી છે.