ધરમપુર વન વિભાગની ટીમે હેરફેર કરાઈ રહેલા સાગી લાકડાંનો જથ્થો ભરેલા ટેમ્પો ઝડપી પાડયો હતો. ધરમપુર વન વિભાગના આંબા રાઉન્ડના ફોરેસ્ટર શક્તિસિંહ ચાવડા સહિતના સ્ટાફે રવિવારે રાત્રે હાથ ધરેલા પેટ્રોલિંગ દરમિયાન તેઓને આઈસર ટેમ્પોમાં સાગનો જથ્થો પસાર થઇ રહ્યો હોવાની બાતમી મળી હતી.

જેના આધારે વન વિભાગની ટીમે બામટી-નાની ઢોલડુંગરી રોડ ઉપર ગોઠવેલી વોચ દરમિયાન બાતમીવાળો ટેમ્પો આવી પહોંચ્યો હતો. જેને રોકવા માટે વનકર્મીઓએ ઈશારો કરતા ચાલકે ટેમ્પો હંકારી મુક્યો હતો. જેથી વન વિભાગની ટીમે પીછો પકડીને ટેમ્પોને ઓઝરપાડા ગામ પાસે પકડી પાડીને ચાલક ગૌરાંગ મનુ ગાંવિતની અટક કરી હતી. ટેમ્પોને માલનપાડા ડેપો ખાતે લઇ જઈ તપાસ કરાતા ૨૩ નંગ સાગી લાકડાં (કિંમત રૂ. ૩૦,૦૦૦) તથા ટેમ્પો (કિંમત મળી કુલ રૂ. ૧.૩૦ લાખ) કબજે લઇ વન વિભાગે કાર્યવાહી હાથ ધરી છે.