વલસાડનાં શાકમાર્કેટ વિસ્તારમાં લારી પર દ્રાક્ષ ખરીદતી પારડીના પરિયા ગામની વૃદ્ધાને વાતોમાં ભોળવી ત્યાં હાજર બે ઠગ મહિલાએ ગળામાંથી રૂપિયા ૭૫ હજારની કિંમતની સોનાની ચેઇન લઈ ભાગી ગયા હતા. મળતી માહિતી મુજબ, પારડી તાલુકાનાં પરિયાગામનાં સુથારવાડ વિસ્તારમાં બિંદુબેન પંચાલ (ઉ.વ.૭૫) પતિ છોટાલાલ રતનજીભાઈ પંચાલ, પુત્ર હેમંત અને પુત્રી સોનલબેન સાથે રહે છે. છોટાલાલની બીમારીની સારવાર વલસાડની નવજીવન હોસ્પિટલમાં ચાલી રહી છે. જોકે છોટાલાલને સારવાર માટે હોસ્પિટલમાં લાવવાના હતા.

જેથી બિંદુબેને તેમની કાર ચલાવવા માટે ગામમાં રહેતા અશોકભાઈ ઉર્ફે મુન્નાભાઈ મોહનભાઈ પટેલને તેડાવ્યો હતો. તેમજ હોસ્પિટલમાં સારવાર કરાવ્યા બાદ બિંદુબેન અને તેમના પતિ શાકભાજીની ખરીદી કરવા માટે બપોરે વલસાડના શાકભાજી માર્કેટમાં ગયા હતા. છોટાલાલ અને કાર ચાલક કારમાં બેઠા હતા. જયારે બિંદુબેન લારી પર દ્રાક્ષની ખરીદી કરવા પહોંચ્યા હતા. તે સામયે લારી પર હાજર બે અજાણી મહિલાઓએ બિંદુબેનને વાતમાં ભોળવી, તેમની નજર ચૂકવીને રૂપિયા ૭૫ હજારની કિંમતની સોનાની ચેઈન આંચકીને ફરાર થઈ ગઈ હતી. બિંદુબેન કારમાં બેસીને તેમના ગળાના ભાગે હાથ ફેરવી તપાસ કરતા સોનાની ચેઈન ગાયબ હોવાનું જણાયું હતું. બિંદુબેને અજાણી મહિલાઓ ઠગ હોવાની શંકા સાથે સિટી પોલીસ મથકમાં ફરિયાદ નોંધાવતા પોલીસે ગુનો નોંધી વધુ તપાસ શરૂ કરી હતી.