કુકરમુંડા તાલુકાને અડીને આવેલ મહારાષ્ટ્ર રાજ્યના નંદુરબાર જિલ્લામાં આવેલ સાતપૂડા પર્વતના જંગલો તરફથી ખૂંખાર દીપડા કે અન્ય વન્ય પ્રાણીઓ ખોરાક-પાણીની શોધમાં કુકરમુંડાના હદ વિસ્તારમાં નીકળી આવતા હોવાથી આવા વન્ય પ્રાણીઓ લોકોની નજરે ચઢે છે. કુકરમુંડાની સીમમાં તાપી નદી પસાર થતી હોય જેથી આવા ખૂંખાર વન્ય પ્રાણીઓને પાણી સરળતાથી મળી રહે છે અને તાપી નદી કિનારાઓ અડીને શેરડીના મોટા ખેતરો આવેલ હોવાથી જંગલોમાંથી નીકળી આવેલા ખૂંખાર દીપડાને વસવાટ કરતા હોય છે અને ખેડૂતોના પાલતું પશુઓનું શિકાર કરીને પોતાનો ખોરાક પણ મેળવતા હોવાથી ખેડૂતો અને પશુ પાલકોઓને ખેતરોમાં જવા માટે મુશ્કેલ બન્યું છે.

કુકરમુંડા ગામમાં એ.પી.એમ.સી. કંપાઉન્ડ વોલની પાછળ આવેલ શેરડીના ખેતરોમાં બહાર આવી રહેલ દીપડાને સ્થાનિક લોકોએ નજરે જોતા લોકોમાં ભયનો માહોલ વ્યાપી ગયો હતો. જોકે, લોકોએ જોઇને તે પુન: શેરડીના ખેતરોમાં ઘુસી જતા લોકો હવે ખેતર વિસ્તારમાં જવા માટે ભય અનુભવી રહ્યા છે. ત્યારે વનવિભાગ પાંજરાની ગોઠવણ કરી દીપડાને પૂરે તો ખેડૂતો ભય મુક્ત થઈ ખેતી કામ કરી શકશે. (ફાઈલ ફોટો)