ઉમરગામનાં ગાંધીવાડી ચિત્રકૂટ વિસ્તારમાં રહેતા અમનબાબુ ગૌતમ વોટર સપ્લાયરનો ટેમ્પો ચલાવી ગુજરાન ચલાવે છે. અંકુશ રાયે પાંચેક દિવસ પહેલા ટેમ્પોમાં બેસેલા તેના મિત્ર સાહિલને નીચે ઉતારવાનું કહેતાં અમન બાબુએ ના પાડી હતી. આ બાબતની અદાવત રાખી સોમવારે સાંજે અમનબાબુ આનંદનગર ચાર રસ્તા પાસે પાણી આપવા માટે જતો હતો.

ત્યારે ટેમ્પો પાસે આવીને અંકુશે તેને અપશબ્દો બોલી ચાકુ વડે હાથની હથેળીમાં, કાંડા પાસે અને હાથના ભાગે તથા આંખની ઉપર, પીઠના ભાગે ઉપરાછાપરી ઘા ઝીંકી દીધા હતા. જેથી અમન બાબુને શરીરના ભાગેથી લોહી નીકળવા લાગ્યું હતું. ત્યારબાદ અંકુશ રાય તેને જાનથી મારી નાંખવાની ધમકી આપી જતો રહ્યો હતો. અમન બાબુને ઈજા થવાથી ઉમરગામની ખાનગી હોસ્પિટલમાં લઈ જવાયા હતા જ્યાં તેમને ડાબી આંખની ઉપર ચાર ટાંકા આવ્યા હતા. આ ઘટના અંગેની ફરિયાદ અમનબાબુએ ઉમરગામ પોલીસ મથકમાં કરતા પોલીસે અંકુશ ઓમપ્રકાશ રાય (રહે.આનંદનગર, ગાંધીવાડી) વિરુદ્ધ ગુનો નોંધ્યો હતો.