સુરતનાં પલસાણા તાલુકાનાં તાતીઝગડા ગામે રહેતો યુવક બલેશ્વર ગામની સીમમાં હાઇવે પર રોડ ક્રોસ કરી રહયો હતો. તે સમયે અજાણ્યા વાહન ચાલકે અડફેટે લેતા તેનું મોત નીપજયું હતું. સુત્રો પાસેથી મળતી માહિતી અનુસાર, પલસાણાનાં તાતીઝગડા ગામે રોડ ફળિયામાં રહેતા રવજીભાઈ સુકાભાઈ રાઠોડ (ઉ.વ.40) નાઓ કે જેઓ રાત્રિના સમયે બલેશ્વર ગામની સીમમાં અમદાવાદથી મુંબઈ તરફ જતાં નેશનલ હાઈવે નંબર-48 ઉપર બલેશ્વર-તાતીઝગડા તરફ જવાના કટ પાસે રોડ ક્રોસ કરી રહ્યા હતા. 

તે સમયે કોઈ અજાણ્યા વાહનનો ચાલક તેમને અડફેટમાં લઈ ભાગી છૂટ્યો હતો. જયારે સર્જાયેલા આ અકસ્માતમાં રવજીભાઈ રાઠોડને શરીરે ગંભીર ઇજા પહોંચતા સારવાર માટે પલસાણા સામૂહિક આરોગ્ય કેન્દ્ર ખાતે લઈ જતાં ફરજ પર હાજર તબીબે તેમને મૃત જાહેર કર્યા હતા. બનાવ અંગે પલસાણા પોલીસે ગુનો નોંધી આગળની કાર્યવાહી હાથ ધરી હતી. 

​