સુરતનાં પલસાણા તાલુકાનાં શેઢાવ ગામની સીમમાંથી કડોદરા પોલીસે વિદેશી દારૂ ભરેલ લક્ઝરીયસ કાર તેમજ પાયલોટિંગ કરનાર કાર ઝડપી પાડી હતી. પોલીસે પીછો કરતાં કાર રોડની બાજુમાં આવેલ ખાડામાં ઉતરી ગઈ હતી. જોકે બંને કારના ચાલક અને ક્લીનર ભાગી છૂટ્યા હતા. પોલીસે કુલ 19.77 લાખનો મુદ્દામાલ ઝડપી પાડી 5 વ્યક્તિઓને વોન્ટેડ જાહેર કર્યા હતા. સુત્રો પાસેથી મળતી માહિતી અનુસાર, કડોદરા પોલીસ સ્ટાફના માણસોને બાતમી મળતા તેમણે નિયોલથી શેઢાવ જતાં રોડ ઉપર વોચ ગોઠવી હતી. તે દરમિયાન વિદેશી દારૂ ભરેલ એક લક્ઝરીયસ કારનું પાયલોટિંગ કરતી કાર નંબર જીજે/19/બીએ/0989 આવતા તેને અટકાવી હતી.જોકે કાર ચાલક અને ક્લીનર ખેતરમાં ભાગી છૂટ્યા હતા. ત્યારબાદ વિદેશી દારૂ ભરેલ લક્ઝરીયસ કાર આવતા તેને અટકાવવાની કોશિશ કરી હતી પરંતુ કારનો ચાલક કાર પોલીસ સ્ટાફને જોઈ રિવર્સ ભાગવા લાગ્યો હતો અને કાર રોડની બાજુમાં આવેલ ખાડામાં ઉતારી દીધી હતી અને કારમાં બેસેલ ચાલક અને ક્લીનર ભાગી છૂટ્યા હતા. ઘટના સ્થળે પહોંચેલ પોલીસે કારમાંથી વિદેશી દારૂની 2235 બોટલ જેની કિંમત રૂપિયા 2,70,040 તથા 2 કાર મળી કુલ રૂપિયા 19,77,040/-નો મુદ્દામાલ કબ્જે કરી 5 વ્યક્તિઓને વોન્ટેડ જાહેર કરી આગળની કાર્યવાહી હાથ ધરી હતી.