નર્મદા જિલ્લાનાં ડેડીયાપાડા નેત્રંગ રોડ પર પાર્ક કરેલ બાઈક ચક્કર મારવાના બહાને લઈ નાશી જનાર શખ્સ સામે ફરિયાદ નોંધાઈ છે. સુત્રો પાસેથી મળતી માહિતી અનુસાર, અજયભાઇ જેસીંગભાઇ વસાવાએ આપેલી ફરિયાદ મુજબ તેઓ પોતાની યામાહા કંપનીની બાઈક ઉપર બેસેલ હતા. તે સમયે એક અજાણ્યો શખ્સ ત્યાં આવી તેમની બાઈક તરફ જોઇ કહેલ કે, મે આવી બાઈક કોઇ દિવસ ચલાવેલ નથી. જેથી મને તારી બાઈક એક ચક્કર મારવા સારૂં આપ. તેમ કહી હોટેલનાં પાર્કીંગમાં પડેલો બીજાનો આઇસર ટેમ્પો બતાવી, પોતાનો હોવાનું જણાવ્યું હતું. આઇસર ટેમ્પાની ચાવી આપી તેમને વિશ્વાસમાં લઇ ચક્કર મારવાના બહાને તેમની બાઈક લઇ જઇ પરત નહીં આવતાં અજયભાઈ વસાવાની ફરિયાદના આધારે ડેડીયાપાડા પોલીસે અજાણ્યા શખ્સ વિરુદ્ધ ગુનો નોંધી તપાસ હાથ ધરી છે.