નિઝરનાં વ્યાવલ ગામે ખુલ્લા ખેતરમાં સિમેન્ટનો વીજ પોલનો થાંભલો તૂટી ગયો હતો. જેથી પાવર સપ્લાય બંધ કરી તેના પર વાયર નાંખી વીજ કંપનીનાં બે લાઈન મેન થાંભલો નીચે ઉતારી રહ્યા હતા તે સમયે સપ્લાય બંધ હોવા છતાં કરંટ લાગતા બંને લાઈન મેનને નિઝર સરકારી દવાખાને લઈ જવાતા મુબારકપુર ગામે રહેતા એક લાઇન મેનનું મોત નિપજ્યું હતું.

સુત્રો પાસેથી મળતી માહિતી મુજબ, નિઝર તાલુકાનાં વ્યાવલ ગામની સીમમાં ખુલ્લા ખેતરમાંથી પસાર થતી વીજ લાઈન પર સિમેન્ટનો એક થાંભલો ઉપરથી તૂટી ગયો હતો જેથી નિઝર વિજ કંપનીનો સ્ટાફ બપોરે કામગીરી માટે ગયો હતો અને થાંભલા પરની બીજ લાઇનનો પાવર સપ્લાય બંધ કરીને હસમુખભાઈ કાશીનાથભાઈ પટેલ (રહે.મુબારકપુર, તા.નિઝર) અને મીતભાઈ સુરેશભાઈ પટેલ (રહે.66 કેવી જીઈબી કોલોની, નિઝર) બંને ઉપર ચડ્યા હતા અને બંધ લાઈન પર સર્વિસ વાયર ઉપર નાંખી થાંભલો નીચે ઉતારી રહ્યા હતા તે સમયે પાવર સપ્લાય બંધ હોવા છતાં કોઈ કારણે બંને લાઈન મેનને કરંટ લાગ્યો હતો. જેથી તાત્કાલિક સરકારી બોલેરો જીપમાં બંનેને બેસાડી નિઝર સરકારી દવાખાને લાવતા હસમુખભાઈ પટેલનું મોત નિપજ્યું હતું જ્યારે મિત પટેલ સારવાર હેઠળ હોય લાઈન ઇન્સ્પેક્ટર મહેન્દ્રભાઈ રામચંદ્રભાઇ સોનવાણેએ નિઝર પોલીસ મથકે અકસ્માત મોતની જાહેરાત આપી હતી.