માંડવીના ઘંટોલી ગામના યુવાને ૧૭ વર્ષીય સગીરાને પ્રેમજાળમાં ફસાવી બણભા ડુંગરે લઈ જઈ એકાંતમાં અશ્લીલ ફોટાઓ પાડી લીધા હતા. ત્યાર બાદ તેણે સગીરાને બદનામ કરવાના ઈરાદે આ ફોટા ઈન્સ્ટ્રાગ્રામ પર અપલોડ કરી ગાળો આપી હતી. આ કૃત્ય બદલ યુવક સામે પોક્સો સહિતની વિવિધ કલમો હેઠળના ફોજદારી ગુનાનો કેસ બારડોલી સેસન્સ કોર્ટમાં ચાલ્યો હતો. કોર્ટે યુવાકને કસૂરવાર ઠેરવી બે વર્ષની સખ્ત કેદની સજા ફટકારતો હુકમ કર્યો છે.

બનાવની વિગત એવી છે કે, માંડવી ગામનાં ઘંટોલી ગામના ૨૬ વર્ષીય પ્રજ્ઞેશ કુંવરસિંગ ચૌધરી ઉર્ફે ચીલિયાભાઈ ચૌધરીએ ૧૭ વર્ષની સગીરાને પ્રેમજાળમાં ફસાવી તેણીના અશ્લીલ ફોટા પાડી ઈન્સ્ટ્રાગ્રામ પર અપલોડ કરી લીધા હતા. તે ઉપરાંત આ સગીરાને ગાળ ગલોચ કરી બદનામ કરવાનું કૃત્ય કર્યુ હતું. યુવક સામે નોંધાયેલી પોલીસ ફરિયાદનો કેસ બારડોલીની સેશન્સ કોર્ટમાં ચાલી ગયો હતો. જ્યાં એ.પી.પી. નિલેશ એચ.પટેલની દલીલ સાંભળી તથા રજુ થયેલા પુરાવાઓ ધ્યાને લઈ આરોપી સામેનો ગુનો પુરવાર થયો હોવાનું માની બારડોલીના પાંચમા એડીશનલ સેશન્સ જજ રોબીન પી.મોગેરાએ પ્રજ્ઞેશભાઈ ચૌધરીને બે વર્ષની સખ્ત કેદની સજા તથા રૂ.૧૫,૦૦૦/-નો દંડ ફટકાર્યો હતો. જો તે દંડ નહીં ભરે તો વધુ છ માસની સાદી કેદની સજા ભોગવવાનો હુકમ કરવામાં આવ્યો છે.