અંકલેશ્વરની ગાર્ડન સીટી ટાઉનશીપ નજીક ખાલી ટેન્કરમાં કોઈ કારણોસર ઉતરતા એક વ્યક્તિનું મોત નિપજ્યુ હતુ. જયારે તેને બચાવવા જતા અન્ય વ્યક્તિને ગંભીર અસર થઇ હતી. રાત્રે અંકલેશ્વર જીઆઇડીસીને અડીને આવેલા ગાર્ડન સીટી રોડ પરના માધવ પાર્ક પાસે ખાલી ટેન્કરમાં સફાઈ કે અન્ય કોઈ કારણોસર ટેન્કર ચાલક સુનિલકુમાર રાજારામ પાલ ટેન્કમાં તેમાં ઉતર્યો હતો.

એકાએક તે તેમાં બેહોશ થતા, પ્રિમાઇસીસના માલિકનો પુત્ર ભાવિન હરીશ્યામ પાલ તેને બચાવવા ટેન્કરમાં ઉતર્યો હતો, પરંતુ તે પણ બહાર ન આવતા અંતે અંકલેશ્વર ડીપીએમસી ફાયર બ્રિગેડને જાણ કરાતા, બંનેને બહાર કાઢવામાં આવ્યા હતા. જેમાં ચાલકનું મોત નીપજ્યુ હતુ, જયારે ગંભીર હાલતમાં માલિકના પુત્રને તાત્કાલિક સારવાર માટે જિલ્લાની બહારની હોસ્પિટલમાં ખસેડવામાં આવ્યો હતો. બનાવ અંગે અંકલેશ્વર જીઆઈડીસી પોલીસને જાણ કરાતા પોલીસે અકસ્માત મોતનો ગુનો નોંધી તપાસ હાથ ધરી હતી.