એક વર્ષમાં ખાણી-પીણીના ભાવમાં મોટા પાયે વધારો થયો છે. સરકારના પ્રયાસો છતાં ભાવ નિયંત્રણમાં આવતા નથી. મીઠાના ભાવમાં પણ વધારો થયો છે. ગ્રાહક મંત્રાલયના ડેટા દર્શાવે છે કે, એક વર્ષ પહેલા ચોખાની કિંમત 34.86 રૂપિયા પ્રતિ કિલો હતી, જે હવે વધીને 37.38 રૂપિયા થઈ છે. ઘઉં 25 રૂપિયાથી વધીને 30.61 રૂપિયા જ્યારે લોટ 29.47 રૂપિયાથી વધીને 35 રૂપિયા પ્રતિ કિલો થયો છે.

અરહર દાળ એક વર્ષ પહેલા 104 રૂપિયા પ્રતિ કિલો હતી જે હવે 108 રૂપિયા પ્રતિ કિલો છે. અડદની દાળ 104 રૂપિયાથી વધીને 107 રૂપિયા પ્રતિ કિલો, મસૂર દાળ 88 રૂપિયાથી વધીને 97 રૂપિયા પ્રતિ કિલો અને દૂધ 48.97 રૂપિયાથી વધીને 52.41 રૂપિયા પ્રતિ લિટર થયું છે. RBIના અંદાજ મુજબ છૂટક ફુગાવાનો દર હજુ પણ 6 %થી ઉપર રહેશે.ઉપભોક્તા મંત્રાલયે તેલની કિંમતો ઘટાડવા માટે ઘણી વખત ઓઇલ કંપનીઓ અને સંગઠનોને બોલાવ્યા છે. કંપનીઓનું કહેવું છે કે, તેઓ સતત તેલની કિંમતોમાં ઘટાડો કરી રહી છે. પરંતુ હજુ પણ ઓપન માર્કેટમાં તેલના ભાવ 150 રૂપિયા પ્રતિ લિટરની ઉપર છે.