આવકવેરા વિભાગે તાજેતરમાં રિયલ એસ્ટેટ અને હીરા જવેલરીનો બિઝનેસ કરનારા બિહારનાં કેટલાક બિઝનેસ જૂથો પર દરોડા પાડી 100 કરોડ રૂપિયાનું કાળું નાણું પકડી પાડયું છે. સેન્ટ્રલ બોર્ડ ઓફ ડાયરેક્ટ ટેક્સિસ (સીબીડીટી)એ મંગળવારે આ માહિતી આપતા જણાવ્યું હતું કે, આ દરોડા તા.17  નવેમ્બરે બિહાર, લખનઉ અને દિલ્હીમાં પટણા, ભાગલપુર અને ડેહરી આન સોનમાં આ જૂથોના લગભગ 30 પરિસરોમાં પાડવામાં આવ્યા હતાં. સીબીડીટી અનુસાર દરોડા દરમિયાન 5 કરોડ રૂપિયાથી વધુની બિનહિસાબી રોકડ અને જવેલરી જપ્ત કરવામાં આવી હતી અને 14 બેંક લોકર સીલ કરવામાં આવ્યા હતાં.

જોકે સીબીડીટીએ બિઝનેસ જૂથોનાં નામ જાહગેર કર્યા સિવાય એક નિવેદનમાં જણાવ્યું હતું કે, સોના અને હીરાનાં ઘરેણાનો બિઝનેસ કરનારા એક જૂથના કેસમાં દસ્તાવેજો અને અન્ય સામગ્રીની તપાસથી જાણવા મળ્યું હતું કે, તેમણે પોતાની બિનહિસાબી આવકને સંતાડવા માટે જવેલરી રોકડામાં ખરીદી હતી. બોર્ડે જણાવ્યું હતું કે, તપાસમાં જાણવા મળ્યું હતું કે જૂથે ગ્રાહકો પાસેથી એડવાન્સમાં 12 કરોડ રૂપિયાથી વધુની રકમ પોતાના હિસાબી ચોપડાઓમાં નોંધી હતી.