અંક્લેશ્વર તાલુકાનાં ઉછાલી ગામની સીમમાંથી કદાવર દીપડો પાંજરે પુરાતા ગ્રામજનોએ હાશકારો અનુભવ્યો હતો. ઉછાલી ગામે છેલ્લા કેટલાક સમયથી દીપડાએ આંટાફેરા કરતા ગ્રામજનોમાં ફફડાટ ફેલાયો હતો. દીપડાએ ગામની સીમમાં ત્રણ જેટલા બકરાનું મારણ પણ કર્યું હતું. ગ્રામજનો દ્વારા આ અંગે વન વિભાગને જાણ કરવામાં આવતા વન વિભાગ દ્વારા ગામની સીમમાં પાંજરું ગોઠવવામાં આવ્યું હતું. આ પાંજરામાં રાત્રીના સમયે દીપડો આબાદ ઝડપાઈ ગયો હતો. દીપડો પાંજરે પુરાવાની વાત ફેલાતા લોકોના ટોળેટોળા ઉમટી પડ્યા હતા. બનાવની જાણ થતા જ વન વિભાગના અધિકારીઓ પણ દોડી આવ્યા હતા અને દીપડાને સુરક્ષિત જગ્યાએ છોડી મૂકવાની તજવીજ હાથ ધરી હતી.