કલોલનાં સાંતેજ ગામમાં કારની ટક્કરથી એકટીવા પર સવાર બે યુવકો ઈજાગ્રસ્ત થયા હતા. બંને યુવકોને પગે ફેકચર થતા તેમને સારવાર માટે હોસ્પિટલમાં ખસેડવામાં આવ્યા હતા.

અમદાવાદના સૈજપુર બોઘા વિસ્તારમાં રહેતા મુકેશકુમાર પ્રહલાદભાઈ પટેલ પોતાનું એકટીવા નંબર જીજે/27/એન/1683 ઉપર પોતાના મિત્ર સાથે કલોલ તાલુકાનાં સાંતેજ ગામે કોઠારી ચાર રસ્તા પાસેથી પસાર થઈ રહ્યા હતા. તે સમય દરમિયાન પુરઝડપે અને ગફલતભરી રીતે હંકારી લાવતા કાર નંબર એમએચ/14/બીએક્સ/5977નાં ચાલકે મુકેશભાઈનાં એકટીવાને ટક્કર મારતા અકસ્માત સર્જાયો હતો. જેમાં એકટીવા પર સવાર બંને યુવકોને પગે ફેકચર થયું હતું. ઈજાઓ પહોચતા તેમને સારવાર માટે હોસ્પિટલમાં ખસેડવામાં આવ્યા હતા. આ બનાવ અંગે પોલીસે ગુનો નોંધી આગળની તપાસ હાથ ધરી હતી.